Gjykata e Krimeve të Rënda ka miratuar kërkesën e Prokurorisë së Krimeve të Rënda për të dhënë masën e sigurisë “arrest me burg në mungesë” për Arbër Çekajn, pronarin e kompanisë që solli kontejnerin me 613 kilogramë kokainë nga Kolumbia.
Vendimi i gjykatës është dhënë në mungesë të të akuzuarit, i cili u largua nga Shqipëria për në Gjermani tre ditë para se të kapej sasia e drogës në kamionin me banane. Me marrjen e këtij vendimi Policia e Shtetit e shpall në kërkim ndërkombëtarë Çekajn i cili akuzohet për trafik të lëndëve narkotike.
Në kontejnerin e porositur nga kompania “Arbri Garden” u gjetën 613 kg kokainë, e fshehur në dyshemenë e dyfishtë të kamionit, vlera e së cilës shkonte deri në 180 milionë euro. Sekuestrimi i saj u bë mbrëmjen e 27 shkurtit, ku u arrestua shoferi i kamionit Armando Pezaku dhe menaxheri i kompanisë Donald Lushaj. Kjo ishte sasia më e madhe e kokainës e kapur ndonjëherë në Shqipëri dhe itinerari i sasisë së ardhur ishte Kolumbi-Maltë-Itali.
Kujtojmë se pak ditë më parë i Arbër Çekaj, telefonoi nga Gjermania për të hedhur poshtë të gjitha akuzat ndaj tij dhe premtoi se do të vinte në Shqipëri për tu përballur me drejtësinë.
