Avokatët mbrojtës e dy të arrestuarve për 613 kg kokainë të kapur në Durrës, kanë ankimuar vendimin për masën e sigurisë të dhënë nga Gjykata e shkallës së parë për Krimet e Rënda.
Gjykata e Krimeve të Rënda vendosi masën e sigurisë “arrest me burg” për shoferin Armando Pezaku dhe menaxherin e kompanisë “Arber Garden”, Donald Lushajn. Ankimini i masës, për dy të arrestuarit bëhet me arsyen se ndaj tyre nuk ka asnjë provë që mund t’i lidhë me sasinë e gjetur në kontenier.
Avokatët pretendojnë se klientët e tyre nuk kanë lidhje me lëndën narkotike. Avokati, Maks Haxhia, i cili mbron menaxherin Donado Lushaj tha pas seancës se prokuroria nuk paraqiti asnjë provë, ndërsa për çështjen nuk kishte hetime të mëparshme.
Edhe dy të arrestuarit kanë mohuar të kenë lidhje me sasinë e kokainës së sekuestruar dhe të dy kanë thënë se trafikantët mund të kenë ngatërruar kontenierin. Shoferi Armando Pezaku ka thënë se kishte pak muaj që punonte në këtë linjë, ndërkohë që rezulton se kompania nuk ka pasur ndonjë shofer tjetër. Ndërsa menaxheri i kompanisë ishte ai që shkoi të zhdoganonte kontenierin e ardhur nga Kolumbia.
