Sot Gjykata e Durrësit ka dhënë masën e sigurisë “Arrest me burg” për 17-vjeçarin, Devi Lala që vrau me thikë bashkëmoshatarin e tij pak ditë më parë. Seanca gjyqësore për dhënien e masës së sigurisë për Lalën është dhënë me dyer të mbyllura, për shkak se i akuzuari është nën moshë.
Në gjendje të rënduar psikologjike, mësohet se 17-vjeçari ka thënë se është detyruar ta qëlloi dhe se e ka bërë për t’u mbrojtur. Ai ka bërë të ditur se është sulmuar më parë nga Anxhelo Gjokazaj, e më pas ka reaguar ndaj sulmit.
“Më sulmoi vetë i pari, më goditi në kokë me celular, unë nxora thikën nga frika për t’u mbrojtur. E qëllova nga frika, jam penduar shumë për veprimin tim, mund ta kisha shmangur”, mësohet se ka thënë Lala gjatë seancës gjyqësore.
Kujtojmë se në Komisariatin e Durrësit, në momentin që po merrej në pyetje Lala pati dhënë se sherri filloi nga hedhja e një shikimi:
“Po më shikonte. Pse më shikon i thashë, ka ndonjë gjë për të parë?! Ai më ofendoi, më shau. I thashë, pusho se do ta pësosh keq, ai vazhdonte të më shante. Edhe unë nisa ta shaja dhe u përleshëm fizikisht. Në një moment nxora thikën dhe e qëllova disa herë. Nuk më kujtohet se sa herë i qëllova, pasi isha në gjaknxehtësi e sipër. Por, pashë që mbeti i shtrirë në tokë dhe u mbulua nga gjaku. Në këtë moment u tremba dhe u largova, pak metra më tej hodha thikën në një kanal”, tha 17-vjeçari gjatë marrjes në pyetje nga policia. Tirana Today
