Një parakalim i gabuar u ka kushtuar jetën katër pjesëtarëve të një familjeje në Turqi. Sipas gazetës “Hurriyet”, aksidenti i rëndë ndodhi mbrëmjen e së mërkurës në rrugën Erzurum-Bayburt, ku si pasojë e një parakalimi të gabuar makina që transportonte 5 anëtarë të një familjeje është përplasur kokë-më-kokë me një kamion që transportonte kafshë.
Aksidenti raportohet se ndodhi në një segment ku kishte punime në rrugë. Si pasojë e përplasjes së fuqishme në vendngjarje kanë humbur jetën Ibrahim Aydin 54 vjeç, nëna e tij Ayse Aydin 72-vjeçe, bashkëshortja Gulyeter Aydin 49-vjeçe dhe i biri Muhammed Aydin 8-vjeç. Në aksident po ashtu u plagos rëndë edhe vajza Kevser Aydın Kara 23-vjeçe.
Në vendngjarje kanë mbërritur forca të shumta policie, kërkim shpëtimi dhe ambulanca, të cilat dërguan menjëherë në spital të plagosurën.
Selfie e fundit
Pak kohë para aksidentit, të gjithë familjarët ishin ndalur për të drekuar në një restorant ku edhe kishin shkrepur selfien e fundit sëbashku. Fotoja është shkrepur me celularin e 23-vjeçares Kevser Aydın Kara, e cila i kishte vendosur edhe dy zemra kur e kishte postuar në rrjetet sociale.
Familja ishte me banim në provincën Giresun të Turqisë, por kishte udhëtuar drejt Erzurumit për të vizituar një të afërm që vuante dënimin në burg./Tv Klan
