Me siguri e mbani mend kreun e Prokurorisë për Krime të Rënda, Besim Hajdarmataj i cili bëri bujë pas përplasjes së tij me deputetin Saimir Tahiri, teksa kërkoi heqjen e imunitetit të këtij të fundit për të mundësuar më pas arrestimin e ish-ministrit të Brendshëm.
Ky prokuror, edhe pse ka vite eksperiencë pune, rezulton mjaft i varfër teksa vetëdeklaron se nuk ka shtëpi, as makinë dhe as prona.
Madje ai rezulton edhe më i varfër se Kryeprokurorja Arta Marku, e cila me kredi kishte blerë shtrydhëse frutash.
Në formularin e deklarimit të pasurisë të vitit 2016, të siguruar nga CNA.al, të vetmet të ardhurat, Hajdarmataj i ka nga paga si prokuror.
Ai ka deklaruar shtesë nga të ardhurat e pagës përfshirë CASH në shumën 500.000 lekë, gjendjen në llogarinë rrjedhëse 963.466.43 lekë si dhe të ardhurat e përfituara nga paga si Prokuror pranë Gjykatës së Shkallës së Parë për Krime të Rënda në shumën 1.888.439.
Në prill të vitit 2016, Hajdarmatës i është bërë hetim pasuror në mënyrë të hollësishme nga ILDKPKI, pasi u kthye nga Amerika, ku shoqëroi ish-Kryeprokurorin Adriatik Llalla.
Gjithashtu, Hajdarmataj ka firmosur edhe ngjarje të tjera të bujshme në krye Prokurorisë së Krimeve të Rënda, siç është rasti i pilotit italian, Guido Andrea Guidi, i cili u rrëzua me avionin e tij në zonën e Ishmit, i dyshuar se po kryente trafik droge.
Hajdarmataj ndër vite ka drejtuar institucionin e hetimit në qytete si Tropoja apo Kurbini. Ai ka qenë për një periudhë kohe dhe drejtues i prokurorisë në Durrës për të marrë para rreth dy vitesh drejtimin e Prokurorisë së Krimeve të Rënda.
