Presidenti i Komisionit Evropian, Zhan Klod Junkier, ka arritur në Maqedoni, ku u takua me kryeministrin Zoran Zav. Junker në Shkup ka arritur së bashku me komisarin Johanes Han.
Junker, tha se Maqedonia e kuptoi që BE-ja është organizim i vlerave e jo vetëm i zhvillimit ekonomik dhe përfitimeve ekonomike, raporton SHENJA.
“Ju i bëtë reformat që ndonjëherë e habitën edhe botën, me Bullgarinë arritët të bëni marrëveshje miqësore, që e rriti reputacionin e shtetit tuaj në Evropë. Sa i përket çështjes së emrit, nuk do doja të them asgjë pasi ju mbetet juve që ta zgjidhni këtë problem, me miqtë tuaj grek. Duke arritur në aeroportin tuaj e pash se diçka tashmë kishte filluar të ndryshojë në vendin tuaj nga hera e fundit që kisha ardhur”, ka deklaruar Junker.
Ai tha se ata nuk kanë ardhur këtu për të dhënë datë për nisjen e negociatve por “tu themi se jeni në rrugën e duhur dhe nëse vazhdoni kështu, për disa muaj do ta mundësoni Komisionin Evropian që ti propozojë këshillit nisjen e negociatave për qasje në BE. Por ende nuk kemi arritur këtu pasi ekzistojnë ende hapa që duhet ndërmarrë. Shteti juaj ka shumë merita…Nëse vazhdoni kështu perspektiva evropiane e këtij shteti më nuk do të jetë e kushtëzuar”, deklaroi Junkier.
Kryeministri i Maqedonisë, Zoran Zaev gjatë konferencës së përbashkët me presidentin e KE-së, Zhan Klod Junker, tha se Maqedonia mund t’i jep shumë Evropës. Zaev deklaroi se ka ende shtete anëtare që kanë rezerva për Maqedoninë por siguroi se nga Maqedonia vetëm do të fitojnë, dhe nuk do të humbin asgjë.
“Ne jemi vend i vogël miqësor, por jemi shtet evropian… Jemi të bindur se në qershor Këshilli do të nisë negociatat me Maqedoninë. Vazhdojmë të punojmë që të marrim mbështetje nga të gjithë shtetet anëtare. Sa i përket çështjes së emrit, për Maqedoninë është e pranueshme një zgjidhje gjeografike që do të bëjë dallimin mes Greqisë veriore dhe Republikës së Maqedonisë. Insistojmë në zgjidhje afatgjate duke marrë parasysh që të mos cenohet identiteti dhe dinjiteti i dy shteteve. Ne duhet të mbajmë përgjegjësi historike për të zgjidhur këtë çështje të hapur” , ka deklaruar Zaev.
Maqedonia është shteti i parë në turnin e Junkerit dhe Hahnit në Ballkan.
