Kryetari i LZHK-së, Dashamir Shehi tha sonte se investimet turke nuk janë bërë asnjëherë në sektorin privat. I ftuar në emisionin “Arena” në Ora News, Shehi deklaron se bizneseve Turke marrin peshqesh prona publik në shkëmbim të një favori. Deputeti thotë se gjithçka që u është dhënë turqve është marrë nga malli i shtetit.
“Ato që i kemi dhënë nga prona publike. Investitor turk që të vijë të blejë një investim privat nuk ka. Këto janë peshqesh publik në shkëmbim të një favori. Më thuaj një investitor turk që të thotë do të blejë këtë fabrikë dhe do të investoj. Shpesh herë mund të ketë qenë një marrëdhënie politike. Banka është dhënë për 1 dollar. Për mua mirë që ia kanë dhënë se është me humbje. Si nivel shkëmbimesh janë në peshë. Të gjitha janë dhënë merr nga malli i shtetit,” deklaroi Shehi.
Kujtojmë se pak kohë më parë Shehi është sulmuar nga kryeministri Edi Rama për pikëpamjet e tij kundër investimeve turke. Kryeministri nuk përmendi emra, por iu referua Shehit teksa tha se: “Dëgjova njërin nga ju që doli në një kazan dhe tha s’duam ne investime turke, ai kur gdhihet ha pilaf e pi raki e fillon drekën me plënc e në aksham groshë fshin buzët me peshqir dhe thotë ne jemi pro europianë. Pilaf, groshë dhe frikë nga ajo që po ju vjen s’keni faj”.
Ndërkohë, Shehi u është përgjigjur deklaratave ironizuese të kryeministrit Rama.
Ai ka thënë se “nuk fëlliqet fare pse ha plonca dhe groshë dhe sipas tij mjafton që t’i shërbejë vendit”.
“Ne të Tironës hamë plonca dhe groshë, por ai ha si aristokratët. Le të thotë se unë ha groshë dhe plonca. Nuk fëlliqem fare dhe mjafton që unë t’i shërbej vendit. Këto janë këlyshët e komunizmit dhe duan ta shesin Shqipërinë për interesat e tyre. Nëse këtu bëjmë batuta me plonca dhe raki, ai është nxënësi im dhe une e lë 200 vite pas, por nuk duhet të merremi me këtë punë. Nuk jemi shteti i karagjozëve. Unë i bëj shërbim vendit tim, ju flisni sa të doni për punën e stomakut”, tha kreu i LZHK.
