Mbrëmjen e djeshme ka ndodhur një atentat i tipit mafioz në Tiranë, pasi persona ende të pa identifikuar kanë vrarë një 64-vjeçar.
Viktima është Memli Begalla, nga Progonati i Tepelenës, baba i tre fëmijëve. Atentati ndodhi rreth orës 21:00, në rrugën “Nikolla Tupe”, në parkingun poshtë pallatit ku ai banonte.
Mësohet se 64-vjeçari u qëllua nga afër me plumb në kokë. Ekzekutori përdori një pistoletë me silenaciator dhe më pas u largua në drejtim të paditur, dyshohet me një makinë tip BMW ngjyrë e zezë. Skena e krimit është ruajtur gjatë gjithë natës nga forcat e policisë dhe mëngjesin e sotëm është rikthyer në vendngjarje grupi hetimor për të kqyrur sërish skenën e krimit për të mbledhur të tjera prova.
Memli Begalla ka qenë biznesmen gomash. Ai zotëronte biznese në Yzberisht dhe në autostradën Tiranë-Durrës. Sipas hetimeve paraprake të policisë, shkak i vrasjes dyshohet të kenë qenë borxhet që viktima u kishte personave të tjerë. TIRANA TODAY
