Ndërtesën e Teatrit Kombëtar ka hapur një debat të madh ndërmjet artistëve dhe kryeministrit Edi Rama. Artistët e kanë cilësuar arrogante përgjigjen e Ramës lidhur me debatin për ndërtesën e Teatrit Kombëtar
Ish-drejtori i Teatrit Eksperimental, regjisori Kastriot Çipi, deklaroi se Rama nuk është mbret dhe se kjo është një çështje shumë e rëndësishme.
“Reagimi i Ramës shumë arrogantë, nuk pranojmë këshilla nga askush, ai nuk është mbret. Duhet që këto gjëra të negociohen. Kjo është një çështje shumë e rëndësishme”,tha Çipi gjatë takimit me avokatin.
Kryeministri Edi Rama u përfshi në debatin e artistëve me ministren e Kulturës, teksa i kthente përgjigje një komentuesi në faqen e tij në ‘Facebook’, ku i fundit e pyeste nëse i kishte dëgjuar Ndrenikën dhe Asqeriun. Rama shkruante se nuk i ka dëgjuar dhe se debati është pa asnjë vlerë, duke shtuar se askush nuk jepte dot leksione.
“Jo Andi nuk i kam dëgjuar dhe nuk e di çfarë plasje kane, po di qe debati për të mbrojtur godinën e rrënuar teatrit, është një debat i stërvjetër, i stërlodhur dhe pa asnjë vlerë e asnjë kuptim sot! Sa ka bere qeveria ime për teatrot, muzetë, stadiumet ne vetëm 4 vjet nuk i kane bere te gjitha qeveritë bashke ne 25 vjet! Nuk mjaftojnë? Aspak. Por ama leksione te asnjë lloji s’na jep dot askush dhe në këto katër vjet do bëjmë ende me shumë, përfshire edhe Teatrin e Ri Kombëtar, duan s’duan ata qe s’dinë fare çfarë duan!”, shkruante Rama.
