Në Olimpiadën Dimërore që po zhvillohet në Korenë e Jugut, ka ndodhur një histori e pazakontë. Mark McMorris, i cili një vit më parë ishte i shtruar në spital me fraktura shumë të rënda ka arritur të fitojë medaljen e bronzit. Kanadezi pësoi një aksident gjatë stërvitjes ku për shkak të mjegullës u përplas me një pemë. Për pasojë frakturat ishin të rënda në disa pjesë të trupit, në krahun e majtë, bel, brinjë të ndryshme të dëmtuara etj.
Sportisti kanadez i garave të “snowboarder”, sot 11 muaj pas aksidentit, ai arrin të ngjitet në podium dhe të marrë medaljen e bronzit në disiplinën e “slopstyle”. Një medalje që vjen një vit pas një aksidentit fatal, një histori që do të ketë mundësi t’ua tregojë edhe nipërve.
“Gjëja e parë që më shkoi në mendje pas aksidentit ishte se nuk do të kisha më mundësi të garoja”, – tha McMorris, por ja që historia sot është krejt ndryshe. Falë vullnetit dhe dëshirës për t’u rikthyer sërish në këmbë dhe për të garuar, ai arriti të rikthehet si më parë. “E adhuroj këtë sport më shumë se çdo gjë tjetër”, tha sportisti 24-vjeçar kanadez, që një vit më parë gjendej në spital duke marrë frymë në mënyrë artificiale pas aksidentit, ndërsa sot është sportisti më i lumtur në botë.