Partia Demokratike nuk heq dorë nga çështja Tahiri! Mësohet se deputetët demokratë do të kërkojnë ngritjen e një komisioni hetimor parlamentar për çështjen në fjalë, teksa kërkojnë që komisioni të verifikojë ligjshmërinë e akteve të Kuvendit e qeverisë dhe ndërhyrjet tek hetimet.
Çështjet që do të shqyrtohen janë 3, konkretisht:
- Verifikimi i ligjshmërisë dhe efekteve të vendimit të Kuvendit për të mos lejuar arrestimin e Tahirit.
- Veprimet e kryeministrit dhe anëtarëve të tjerë të qeverisë në pengimin apo intimidimin e prokurorisë për të hetuar Tahirin në mënyrë të pavarur.
- Ligjshmëria e ekstradimit të Nezar Seitit si person nën hetim për të njëjtën çështje si Tahiri dhe efektet që sjell ekstradimi i tij për ish ministrin e brendshëm.
Partia Demokratike ka akuzuar vazhdimisht Ramën dhe prokuroren e Përgjithshme Marku, si përgjegjës për lejimin e ekstradimit të Seitit, në mënyrë që ky i fundit të mos dëshmonte kundër Tahirit.
“Rama mbron Tahirin, për rrjedhojë mbron veten që të mos i dalin të zezat”, është ky qëndrimi që kanë mbajtur Basha dhe deputetët demokratë, duke e quajtur si antikushtetues ekstradimin e financierit të Habilajve.
