Partizani më në fund rikthehet tek fitorja dhe e bën pikërisht në derbin e kryeqytetit përballë Kamzës. Lajmi mirë për të kuqtë ishte se u zbulua edhe goleadori në këtë sfidë, pasi Jasir Asani shënoi dy gola.
U luajt në “Selman Stërmasi” dhe ishte sfida mbyllëse e javës së 18-të të Superiores, ku të kuqtë fituan 2-1 dhe parakaluan pikërisht Kamzën, që tashmë rrëshqet në vendin e 6-të. Pa u mbushur 6 minuta lojë Asani përfitoi nga një pasiguri e portierit Gjonikaj dhe me portën e Boshatisur e kishte të lehta ta çonte topin në rrjetë. I njëjti futbollist mposht për herë të dytë portierin e Kamzës, por këtë radhë i duhet dhënë meritë Lucas Cardosos, që shërbeu me një asist perfekt.
Kundërpërgjigjja e skuadrës së Ramadan Ndreu ishte shumë e shpejtë, me Sebino Plakun që devijoi saktë e kokë, duke kthyer të tijtë në lojë. Në të dytën ishte Partizani dominues në fillim që gjeti edhe traversën me Trashin dhe bardhin që shpërdoroi një rast të sigurtë për të shënuar.
Interesant fakti që kundër të kuqve u aktivizua në pjesën e dytë Realdo Fili, që deri pak ditë më parë ishte pjesë e Partizanit. Futbollistët e Kamzës e rritën ndjeshëm presionin në fund të pjesës së dytë, por pa mundur ta gjenin golin që do të shmangte humbjen.
