Kryetarja e Lëvizjes Socialiste për Integrim, Monika Kryemadhi ka kërcënuar hapur prokurorët se do tu publikojë një pas një dosjet korruptive. Ajo ka folur për prokurorë të implikuar me kriminelë dhe trafikantë droge.
Kryetarja e LSI-së e ka konsideruar arrestim politik prangosjen e Dashamir Xhikës. Ajo tha se është një arrestim monstruoz i cili nuk do të mbetet me kaq.
Dashamir Xhika, ishte i ardhur nga radhët e Lëvizjes Socialiste për Integrim. Arrestimi është bërë për aferat korruptive me autostradën Tiranë- Elbasan, por kontrolli i sotëm një banesën e tij tregon shumë më shumë në veprimtarinë e tij si drejtues.
Xhika, së bashku me disa ish-punonjës të tjerë të lartë të ARRSH-së, dyshohet se i kanë shkaktuar një dëm prej rreth 54 milionë dollarësh buxhetit të shtetit, me kontratat që kanë ngritur me privatët për ndërtimin dhe mirëmbajtjen e aksit në fjalë.
Gjithashtu, Kryemadhi ka folur se cilët janë peshqit e mëdhenj. Ajo tha se peshq të mëdhenj janë: Edi Rama, Saimir Tahiri, Ditmit Bushati, Etilda Gjoni etj.
“S’ka më tani, tani do fillojmë të flasim dhe ne, për prokurorë të cilët ju mbyllen dosjet tek Krimet e Rënda. Për prokurorë që janë të implikuar në përgjime me grupe kriminale dhe trafikantë droge. Për prokurorë që kanë marrë allishverishe, për deklarimin e pasurisë. Për prokurë që kanë mbajtur çështje të hapura duke bërë shantazh ndaj individëve të institucioneve të shtetit”, deklaroi Kryemadhi në një intervistë për Tema TV.
