Ditën e sotme është zhvilluar seanca gjyqësore për padinë e prokurores Rovena Gashi, ndaj kryeprokurores Arta Marku.
Kjo e fundit largoi Gashin, e cila njihet si njeriu i ish-kryeprokurorit Llalla, nga posti i Drejtoreshës së Marrëdhënieve Juridiksionale me Jashtë në Prokurorinë e Përgjithshme.
Rovena Gashi është përfaqësuar nga avokati Çlirim Gjata, ndërsa Arta Marku nga Pranvera Gruda. Avokatja e kryeprokurores ka kërkuar rrëzimin e padisë, pasi sipas saj është e pabazuar në prova dhe nuk është shkelur ligji.
“Nuk është shkelur asnjë ligj. Informacioni që Rovena Gashi çoi në KQZ për dy deputetet Aqif Rakipin dhe Gledion Rahovica pa u konsultuar me prokuroren Arta Marku solli edhe lirimin nga detyra te Rovena Gashit. Kjo i është komunikuar verbalisht Gashit”, ka thënë avokatja e kryeprokurores, ndërsa vetë Marku ka munguar në seancë.
Në përfundim të seancës, ka folur avokati i Gashit, Çlirim Gjata, i cili deklaroi se nuk ka një motiv të qartë për lirimin e Gashit nga detyra, si dhe ka kërkuar që Marku të shkojë në gjyq.
Sipas Gjatës, nuk është rastësi që ekstradimi i Seitit ndodh menjëherë pas largimit nga detyra të Rovena Gashit.
“Lirimi i Gashit nga detyra, i paqartë. Kërkojmë që Arta Marku të vijë në gjyq. I qëndrojmë padisë dhe provave që kemi dorëzuar.
Debatet në gjyq mos i merr shumë për të madhe, në lidhje me ekstradimin e Seitit, kjo është e gjitha në kundërshtim me ligjin. Verifikohet a ka naj pengesë për ekstradimin e tij? Po, ka pengese. Kur kjo ngjarje ndodh direkt pas heqjes së Gashit”, tha Gjata.