Ekipi kosovar Ferizaj ka surprizuar me lëvizjet që ka bërë në merkato. Gjumin e thellë dimëror ferizajasit e ndërprenë të dielën kur e emëruan Bylbyl Sokolin trajner të ekipit të parë. Dhe, menjëherë të hënën nisën përgatitjet për sezonin pranveror, të cilat në kushte normale do të duhej t’i nisnin shumë më parë.
Për më tepër, vetëm një ditë pasi e emëroi trajnerin e ri, Ferizaj brenda 24 orëve ka arritur t’i bëjë nëntë përforcime. Skuadra nga Liga e Parë madje angazhoi emra të njohur, të cilët gjatë sezonit të kaluar kryesisht luanin në Superligë.
Fjala është për Erdin Hasanin, Qëndrim Dautajn, Adnan Haxhajn, Dren Gashin, Visar Zogianin, Adem Maliqin, Alban Rexhepin, Armend Blakqorin dhe Adem Maliqajn.
