Kryetari i Partisë Demokratike, Lulzim Basha ka zgjedhur t’u dërgojë një mesazh edhe ambasadorëve gjatë fjalës së tij në protestën e sotme para Kryeministrisë.
Basha tha nga foltorja e ngritur se Shqipëria sot vetëm demokraci europiane nuk mund të quhet, ndërsa shtoi se shqiptarëve iu ka arritur thika në palcë nga kjo qeveri dhe opozita e tij s’mund ta pranojë më një situatë të tillë.
“Thika iu ka arritur shqiptarëve në palcë, iu them të huajve se kjo nuk është Shqipëria evropiane, por kjo është diktaturë evropiane. Ne e refuzojmë, nuk e duam Shqipërinë me standardet e Afrikës e Azisë. Unë jam kryetari i një partie që ka lindur me thirrjen ta bëjmë Shqipërinë si gjithë Evropa. Në Shqipëri po zbatohet një projekt antikombëtar, antieuropian, antidemokratik, për pushtetin absolut të një njeriu të vetëm mbi të gjithë Shqipërinë. Për pushtetin e tij, ky njeri ka bërë ortakëri me krimin, me oligarkinë dhe mercenarët e pangopur. Shqipëria e Edi Ramës i ngjan shteteve të falimentuara të Afrikës dhe Azisë”, tha ndër të tjera Basha.
