Autoritetet kanë parashikuar një sërë masash për protestën e opozitës, që do të zhvillohet të shtunën në Tiranë. Kështu, burime zyrtare sqarojnë se për mbarëvajtjen e kësaj proteste që do të nisë në orën 12:00 do të aktivizohen rreth 1500 policë nga komisariatet e Tiranës, Forcat Shqiponja, FLO dhe FNSH. Pranë vendit ku do të mbahet protesta do të stacionohen edhe ambulanca dhe shërbimi zjarrfikës.
Një një njoftim për mediat sqarohet se parapërgatitja për protestën ka nisur më herët. Rreth një javë më parë me një udhëzim të veçantë nga Drejtori i Tiranës u është lënë detyrë komisariateve të evidentojnë personat e dhunshëm. Ata do të monitorohen gjatë protestës me agjentë civilë që do të infiltrohen brenda protestuesve. Ndryshe nga protestat e mëparshme priten të aktivizohen më pak punonjëse policie femra.
Më tej, policia thotë se nga informacionet e marra pritet që protesta të ketë një skenar dhune nga mbështetësit e LSI-së.
Masa ka marrë edhe Policia Rrugore. Autobusët që do të vijë me protestues nuk do të lejohen të futen në qytet. Ata që vijnë nga ana veriore do të stacionohen pranë stadiumit “Asllan Rusi” ndërsa nga ana jugore tek Fakulteti Ekonomik.
Do të ndalohet qarkullimi dhe parkimi i mjeteve tek bulevardi “Dëshmorët e Kombit” dhe rrugët ndërlidhëse të tij. Kufizim të pjesshëm mund të ketë edhe rruga që lidh selinë e PD me Kryeministrinë.
Janë marrë masat dhe për sigurimin e institucioneve në bulevard. PD ka marrë leje nga Policia e Tiranës për një protestë 4 orëshe, e cila nis në orën 12:00 dhe përfundon në orën 16:00.
Është kërkuar informacion dhe nga drejtoritë e qarqeve për personat me precedentë penalë, ndërsa vëmendje të madhe do ketë edhe kontrolli fizik i personave të dyshimtë për armë apo sende të paligjshme në akset kryesore të Tiranës.
