Kryetarja e Lëvizjes Socialiste për Integrim, Monika Kryemadhi me deklaratat e sotme tregoi se nuk i intereson shumë 21 Janari. Në një takim me strukturat e LSI në njësinë numër 11 në Tiranë, Kryemadhi bëri thirrje të bashkohen për të rrëzuar Ramën. Gjatë fjalës së saj, Kryemadhi tha se në 27 janar është koha të zgjohet çdo shqiptar dhe të protestojë kundër pabarazisë. Kryetarja e LSI u shpreh se mjerimi në vend po shtohet çdo ditë e më shumë.
Ndërkohë sot është 21 Janari, dita kur në 2011-ën në bulevard u vranë katër persona, Ziver Veizit, Faik Myrtarjt, Aleks Nikës dhe Hekuran Dedës.
Në atë kohë LSI ishte në koalicion me Berishën, nuk mund të kërkonte “drejtësi”, sepse në 21 Janar 2011 ata ishin mbledhur për të protestuar kundër Metës. Pas 2013-tës për katër vite LSI-ja kërkoi drejtësi për 21 Janarin. Por sa ra nga pushteti nuk i intereson më 21 janari por rrëzimi i Ramës. Kjo sjelle nënkupton se Monikës dhe LSI-së i intereson pushteti dhe jo drejtësia.
“Ne nuk jemi dakord me këtë pabarazi që ekziston dhe të gjithë duhet të protestojmë më 27 janar. Është koha që të zgjohemi dhe të bëhemi të gjithë bashkë kundër pabarazisë. Mjerimi në vend po shtohet çdo ditë. Ne kërkojmë që i gjithë institucioni të sillet ndaj qytetarëve në mënyrë të barabartë dhe ky nuk është mëkat. Por mëkati ynë më i madh është nëse ne do rrimë indiferentë ndaj pabarazisë. Në 27 janar të zgjojmë ndërgjegjen kombëtare dhe të harrojmë flamurin partiak”, deklaroi Kryemadhi në mbledhje.
