Del agjenda e bisedimeve mes Bushatit dhe Kotzias të cilët po negociojnë për t’i dhënë fund mosmarrëveshjeve historike mes vendeve. Duket se kryeministri i Greqisë Tsipras ka porositur Kotziasin që kur të kthehet nga qyteti i Korçës, të vijë me një marrëveshje të dakordësuar, e cila do të firmoset në muajin prill nga dy kryeministrat.
Firmosja e këtyre marrëveshjeve pritet të ndodhë në muajin prill, kur kryeministri Rama do të ketë një takim me homologun grek Aleksis Tsipras.Si kryefjalë kryesore e këtij takimi pritet të jetë marrëveshja e detit, çështje kjo e debatuar prej kohësh mes dy vendeve,ndërsa pritet që kjo t’i hapë rrugë Shqipërisë në integrimin në familjen e Bashkimit Evropian.
Që prej orës 15:00 në qytetin e Korçës është duke u zhvilluar takimi dy palësh Shqipëri-Greqi i dyti pas atij në Kretë me qëllim zgjidhjen e problemeve sa të vjetra dhe të reja mes dy vendeve. Shefat e diplomacisë shqiptare dhe asaj greke së bashku me delegacionet përkatëse për tre ditë do të ngujohen në hotelin “Life Galery” nga ku pritet të ketë tym të bardhë duke arritur një marrëveshje. Për hir të së vërtetës ka rrjedhur pak informacion se çfarë është duke u diskutuar.
Por Report TV nga burime brenda takimit ka mundur të sigurojë një pjesë të agjendës së këtyre bisedimeve të kryesohen nga Bushati dhe Kotzias. Meqenëse takimi zhvillohet në Korçë, është rënë dakord që dita e parë e bisedimeve të nisë me çështjet shqiptare siç janë ato për pronat e kishës ortodokse dhe statusi i tyre aktual.
Gjatë ditës së nesërme në tryezën e bisedimeve do të jenë problematikat e listuara nga komuniteti grek që jeton në jug të vendit. Burime nga ky takim pohuan për Report TV se po ashtu gjatë ditës së nesërme pala shqiptare do të kërkojë heqjen e pengesave për lëvizjen në kufi të çamëve drejt Greqisë.
Mësohet se kryeministri grek Tsipras i ka kërkuar ministrit Kotzias produkt konkret nga ky takim madje ka shkuar më tej. Kryeministri grek ka kërkuar që deri në muajin Prill të mund realizohet firmosja e marrëveshjes për shefin kontinental që njihet si kufiri detar mes dy shteteve.
Sinjalin e parë për ndryshim kursi nga pala greke janë një sërë deklaratash nga ministri i jashtëm grek Kotzias i cili është pozicionuar kundra ligjit të luftës me dy vendeve. Nuk ka mbetur pas në dërgimin e sinjaleve paqësuese edhe Shqipëria. Hapi i parë të treguarit konstruktiv ishte miratimi nga qeveria shqiptare i një vendimi që i hap dritën jeshile ndërtimit të dy varrezave për ushtarët e rënë grek në Këlcyrë të Përmetit dhe Dropullin e sipërm në Gjirokastër.
