Numri i persona të prekur me fruth ka arritur në 16, ndërkohë që vetëm në kryeqytet janë mbi 1200 fëmijë të pavaksinuar.
Personat e prekur janë kryesisht fëmijë, ndërsa sipas Institutit të Shëndetit Publik mund të jetë prekur edhe një i rritur, i cili po mbahet nën mbikëqyrje.
Në një intervistë për “Gazeta Shqiptare”, Adela Vasili, epidemiologe në Departamentin e Kontrollit të Sëmundjeve Infektive në ISHP, shprehet se për fruthin edhe një rast i vetëm përbën epidemi. Por ajo më tej shton se popullata kryesisht është e mbrojtur dhe vetëm 4% e popullatës nuk është vaksinuar. Epidemiologia i bën thirrje të gjithë prindërve që të vaksinojnë fëmijët e tyre në të mirë të shëndetit të tyre.
Sa është numri i fëmijëve të prekur nga fruthi deri më tani në vendin tonë?
Deri tani janë shtruar në Qendrën Spitalore Universitare “Nënë Tereza” 20 fëmijë, nga të cilët 16 janë të konfirmuar me fruth. Të prekurit janë kryesisht fëmijë të moshës nën 1 vjeç që nuk e kanë bërë vaksinën. Por, gjithashtu, rezultojnë me fruth edhe fëmijë mbi 1 vjeç që prindërit ende nuk i kanë vaksinuar. Ndërkohë analizat e 2 fëmijëve janë ende në pritje, ndërsa dy të tjerë kanë rezultuar negativ.
Aktualisht ku po trajtohen të prekurit nga sëmundja dhe si paraqitet gjendja e vogëlushëve?
Fëmijët janë vendosur në një karantinë apo pavion të veçantë në Pediatrinë Infektive në QSUT, ku janë 6 dhoma në katin e dytë për trajtimin e tyre. Mesa kemi kontaktuar me mjekët specialistë, gjendja e fëmijëve nuk paraqitet e rëndë.
A mund të themi se kjo situatë përbën epidemi?
Për fruthin edhe një rast përbën epidemi, por fakti që kemi jo shumë raste të prekura na bën të kuptojmë që popullata ka mbrojtje. Sëmundja po prek vetëm të pa vaksinuarit kryesisht nën 1 vjeç. Pra, ka një lloj mbrojtjeje. Por ne po bëjmë apel që mos të shtyhet vaksinimi, pasi fëmijët e pavaksinuar janë të pambrojtur.
Cilat janë disa nga arsyet që këta fëmijë nuk janë vaksinuar?
Prindërit nuk i kanë vaksinuar për arsye të ndryshme, disa thonë se fëmija ka qenë i sëmurë, disa të tjerë kanë refuzuar vaksinimin me pretekste nga më të ndryshmet.
Sa është numri i të pavaksinuarve në rang vendi?
Në vendin tonë rreth 4% e popullatës janë të pavaksinuar nga fruthi, e po t’i referohemi Tiranës, ka 1200-1300 fëmijë që kanë mbushur 1 vjeç dhe ua kanë shtyrë vaksinimin. Kjo shtyrja është e gabuar e shpresojmë që prindërit të ndërgjegjësohen sa më shpejt. E nëse këta fëmijë janë të grupuar në një zonë të caktuar, atëherë propabiliteti për të përhapur virusin te njëri-tjetri është shumë i madh.
Cilët janë më të rrezikuarit?
Ka fëmijë që nuk vaksinohen për arsye shëndetësore dhe nëse ky fëmijë bie në kontakt me një tjetër që nuk është vaksinuar, sepse prindi ka refuzuar, rrezikon jetën. Pasojat që lë fruthi për këtë kontigjent fëmijësh që nuk mund të vaksinohen pasi janë të sëmurë, janë shumë të rrezikshme. Kështu që të vaksinohen të gjithë për të mbrojtur ata që realisht nuk e bëjnë dot vaksinën e kanë imunodefiçencë.
