Siç mëson Blic, dy kamera sigurie në lokalet poshtë selisë së partisë së Oliver Ivanoviç, mund të kenë filmuar momentin ku atentatorët kanë vrarë liderin serb një ditë më parë në Mitrovicë, shkruan Tirana Today.
Ndërsa, jo shumë larg vendit të ngjarjes policia ka gjetur një makinë të djegur tip “Opel Astra”, e cila dyshohet se është përdorur nga vrasësit të cilët më pas janë larguar në drejtim të panjohur.
Të gjitha masat janë marrë, policia është në terren dhe po kërkon atentatorin. Sipas Blic, policia ende nuk përcakton motivet për të cilat u vra Ivanoviçi. Ajo që dihet është se ai u vra me pesë të shtëna.
Ai kishte pesë plagë të mëdha në pjesën e sipërme të trupit.
Ndërsa sot kortezhi me trupin e pajetë të politikanit serb Oliver Ivanoviç që u vra dje, është nisur drejt Beogradit.
Një numër i madh qytetarësh në Mitrovicën e Veriut dolën për t’i dhënë lamtumirën e fundit kreut të Iniciativës Qytetare SDP. Ceremonia mortore do të zhvillohet ditën e nesërme në Beograd.
Mes të pranishmëve ishte motra Natasha dhe gruaja e të ndjerit Milena Ivanoviç. Oliver Ivanoviç u vra mëngjesin e djeshëm në një atentat në hyrje të partisë që ai drejtonte në veri të Mitrovicës. Vrasja e liderit të serbëve në Kosovë bëri që Serbia të pezullohet procesin e dialogut me Kosovën në Beograd.
Presidenti serb Aleksandar Vuçiç e konsideroi akt terrorist vrasjen e Ivanoviç dhe kërkoi që autoritetet të përfshihen në hetimet që po zhvillohen në Kosovë. Ende nuk ka asnjë të dhënë rreth profilit të vrasësve. TIRANA TODAY
