Pronari i një shtëpie në Ksamil të Sarandës ka rënë pre e grabitësve, orët e para të mëngjesit të së premtes.
Ishte ora rreth 07:30 minuta, ku tre persona të maskuar dhe të armatosur me armë zjarri shkuan në shtëpinë e personit në fjalë, të cilin policia e identifikon vetëm me iniciale P.L.
Grabitësit fillimisht e kanë rrahur dhe e kanë goditur me qytën e armës të zotin e shtëpisë dhe më pas e kanë lidhur. Pas kësaj, ata i kanë marrë çelësat e banesës tre katëshe, e cila përdoret si shtëpi pushimi gjatë sezonit veror dhe kanë hyrë për të vjedhur.
Policia thotë se autorët kanë marrë edhe makinën “Benz”, me targa AA 322 DP, të P.L dhe më pas janë larguar.
Autoritetet kanë ngritur pika kontrolli me qëllim identifikimin dhe kapjen e autorëve, ndërsa grupi hetimor ka nisur punën për zbardhjen e plotë të ngjarjes.
