Makina një efektivi të Policisë Rrugore është shkrumbuar mbrëmjen e së enjtes në Fushë-Krujë, nga persona ende të pa identifikuar, ndërsa në oborrin e shtëpisë së tij janë hedhur edhe dy granata dore.
Burime zyrtare sqarojnë se ngjarja ndodhi rreth orës 23:45, në fshatin Halil. Kur policia mbërriti në vendin e ngjarjes automjeti Audi 80, në pronësi të 60-vjeçarit K.V. ishte djegur plotësisht.
“Menjëherë në vendngjarje kanë shkuar efektivet e Policisë, të cilët kanë konstatuar se automjeti ishte djegur plotësisht dhe në oborrin e banesës së shtetasit të mësipërm kishte dy granata dore, të cilat u morën nga Specialistët Anti- Eksploziv”, sqaron policia në një njoftim.
60-vjeçari mësohet se punon si efektiv i Policisë Rrugore të Tiranës dhe punon në radhët e bluve prej 13 vitesh.
Grupi hetimor po punon intensivisht për identifikimin e autorëve dhe zbardhjen e rrethanave të ngjarjes. Dyshimet e para janë se ngjarja ka lidhje me detyrën e 60-vjeçarit, por po hetohen edhe pista të tjera/tvklan.al
