Gjykata e Apelit ka ulur dënimin për ish-deputetin Mark Frrokun. Ai është dënuar përfundimisht me 6 vite burg, duke kërkuar pafajësi. Frrokut i kanë mbetur më pak se dy vite dënim për të kryer.
Në Gjykatën e Apelit ish-deputetit Frroku dënimi iu ul me 1.5 vite dhe dënohet përfundimisht me 6 vite burg.
Mark Frroku u dënua në prill të vitit të kaluar për pastrim parash, fshehje të pasurisë dhe ndërtim pa leje. Prokuroria në shkallën e parë të gjykimit kishte kërkuar dënimin me 25 vjet burg për ish-deputetin kristian-demokrat për vrasje dhe akuzave të tjera, por Mark Frroku u shpall i pafajshëm për ngjarjen e ndodhur në Belgjikë në vitin 1999.
Ish-deputeti Frroku u dënua për fshehje të ardhurash. Prokuroria bëri ankimin për vrasjen, por kërkesa u rrëzua.
Ankimimi në Apel
Ish-deputeti Mark Frroku kundërshtoi në Apel vendimin e Gjykatës së Tiranës, që e shpalli të fajshëm për tri vepra penale dhe e dënoi me 7 vjet e 6 muaj. Frroku u dënua për “pastrim parash”, “fshehje pasurie” dhe “ndërtim të paligjshëm”, ndërsa fitoi pafajësi për akuzën e “vrasjes me paramendim” për një ngjarje të ndodhur në Belgjikë në vitin 1999.
Në ankimin e depozituar në prill në Apelin e Tiranës nga ana e mbrojtësve të tij, ish-deputeti këmbëngul në pafajësinë e tij për të gjitha akuzat. Ai i kërkoi Apelit të prishë vendimin e Shkallës së Parë dhe të pushojë çështjen ndaj tij, pasi ai nuk ka konsumuar asnjë nga veprat penale për të cilat akuzohet. Sipas ankimit, Gjykata e Tiranës ka gabuar kur ka pranuar si provë aktekspertimin e ekspertes së Prokurorisë së Përgjithshme, Greta Drangu.
