Tashmë paga mes burrave dhe grave do të jetë e njëjtë në shtetin e Islandës. Të hënën hyri në fuqi një ligj që e bën Islandën vendin e parë në botë që legalizon pagesën e barabartë mes burrave dhe grave.
Sipas rregullave të reja, kompanitë dhe agjencitë qeveritare që punësojnë të paktën 25 njerëz do të duhet të marrin certifikatën e qeverisë për politikat e tyre të pagave të barabarta.
Ndërkohë, ata që nuk provojnë barazinë e pagave do të përballen me gjoba.
“Ne kemi pasur legjislacion ku thuhej se paga duhet të jetë e barabartë për burrat dhe gratë për dekada me radhë, por ne ende kemi një hendek pagash”, tha Dagny Osk Aradottir Pind, një anëtare e bordit të Shoqatës Islandeze për të Drejtat e Grave.
Islanda, një vend ishullor në Oqeanin Atlantik të Veriut, është shtëpia e rreth 323,000 njerëzve dhe ka një ekonomi të fortë, bazuar në turizmin dhe peshkimin.
Për nëntë vitet e fundit, ajo është renditur nga Forumi Ekonomik Botëror si vendi më i barabartë gjinor në botë.
Legjislacioni i ri u mbështet nga qeveria e qendrës së djathtë të Islandës, si dhe opozita, në një parlament ku gati 50 përqind e të gjithë anëtarëve janë gra.
“Gratë kanë folur për këtë për dekada me radhë dhe me të vërtetë mendoj se kemi arritur të rrisim vetëdijen dhe ne kemi arritur në atë pikë që njerëzit të kuptojnë se legjislacioni që kemi pasur në vend nuk po funksionon dhe ne duhet të bëjmë diçka më shumë,” shtoi Aradottir Pind.
Qeveria e Islandës ka në plan të çrrënjosë plotësisht hendekun e pagave deri në vitin 2020. TIRANA TODAY
