Zyrtari i lartë i SHBA-së Hoyt Brian Yee, i ka dhënë ultimatum ditën e sotme Serbisë që të distancohet menjëherë nga Rusia. Brian Yee deklaroi se Serbia duhet të ngrihet nga dy karriget në të cilët është ulur tani. Ai rekomandon që fuqimisht të ecë drejt Brukselit nëse vërtet dëshiron të anëtarësohet në Bashkimin Europian.
Në intervistën për agjencinë grek ANA-MPA, Yee për herë të dytë brenda dy muajve e ka këshilluar Serbinë “që t’i tregojë qartë vendeve anëtare të BE-së se është 100 për qind e përkushtuar për pranim dhe të tregojë se e përkrah vizionin e BE-së e jo të Rusisë” .
Deklarata e Yee vjen pothuajse në kohën kur kryetari i Serbisë Aleksandar Vuçiç ka porositur se deri në fund të mandatit të vet, në vitin 2022, do të përfundojë e gjithë puna e duhur për hyrjen e Serbisë në Bashkimin Europian.
Drejtori i Qendrës për Politikë Rajonale, Aleksandar Popov lidhur me këtë thotë se SHBA-ja flet drejtpërdrejt e jo me dorëza si Europa.
“Yee edhe një herë i ka theksuar ambiciet e mëdha të Rusisë që ta përforcojë ndikimin e vet në Ballkan përmes shpinës së Serbisë, ashtu siç provoi kohë më parë në Maqedoni. Problemi është se Rusia ka depërtuar thellë në këtë hapësirë dhe e ka futur në borxh Serbinë. Me votimin kundër Rezolutës për Srebrenicën, pastaj me shitje e “migëve 29”, rusët mendojnë t’i kenë përmbushur dëshirat serbe dhe tash kërkojnë të marrin frytet e punës”, pohon Popov.
“Kur pas një viti e gjysmë të vijë në rend dite statusi i Kosovës, por edhe kapitulli për harmonizimin me politikën e jashtme të BE-së, Serbia do të detyrohet ta bëjë distancën me Rusinë, ose e gjithë agjenda europiane do të bjerë në ujë. Problem është se disponimi antieuropain është gjithnjë e më i madh ashtu që më pak se 50 për qind e banorëve të Serbisë janë për hyrje në BE”, thotë Popov.
