Ish-ministri i Drejtësisë, Ylli Manjani ka dalë publikisht kundër presidentit Meta për letrën dërguar Trump lidhur me cështjen e votimit në Organizatën e Kombeve të Bashkuara.
Në një shpjegim të gjatë në Facebook, Manjani shkruan se kjo letër ishte “e gabuar sa më s’ka”, teksa shprehet se kryetari ynë i shteti i ankohet kryetarit të një shteti tjetër, për shtetin e tij që nuk ekziston fare.
Sipas Manjanit, kjo fabul nuk shkon në asnjë rrethanë, pavarësisht nëse ka pasur apo jo dijeni për votimin që do bënte qeveria.
Ish-ministri gjykon më tej se letra nuk duhej të ishte shkruar, pasi sipas tij “Kushtetuta super konsensuale që miratuan vjet e fshiu fare edhe atë pak shtet që kishte mbetur tek Presidenti i Republikës”, duke përmbyllur se Presidenti është nxituar me atë letër, pasi duhej ta kishte analizuar më parë sjelljen e pushtetit, se është i lexueshëm!
Reagimi i plotë:
Llogari pushteti në kurriz të shtetit
____________
Letra që Presidenti i Republikës sonë i dërgoi Presidentit të SHBA, për çështjen e votimit në OKB ishte e nxituar! E gabuar sa më ska!
Kryetari ynë i shtetit i “ankohet” kryetarit të një shteti tjetër, për shtetin e tij që nuk ekziston fare! Kjo fabul nuk shkon në asnjë rrethanë, pavarësisht nëse ka patur apo jo dijeni për votimin që do bënte qeveria.
Presidenti i Republikës mund të kërkonte shpjegime për atë çështje. Kaq do të mjaftonte për të kuptuar rolin e tij! Të tjerat ishin të tepërta.
Republika e Shqipërisë tashmë edhe ligjërisht është pushtet dhe jo më shtet. Të paktën që prej vitit 2008 kur filloi shkërmoqja e Presidentit si kryetar i Shtetit.
Kushtetuta super konsensuale që miratuan vjet e fshiu fare edhe ate pak shtet që kishte mbetur tek Presidenti I Republikës.
Ndaj gjykoj se ajo letër nuk duhej të ishte shkruar!
Rama, kryetari i pushtetit, bëri një lëvizje pushteti me atë votim në OKB. Duke shfrytëzuar një deklaratë të Presidentit Trump mbi ndërprerjen e ndihmës Amerikane, Rama mjeshtërisht i nguli thikën pas shpine Ambasadorit Lu (bashkëpunëtorit të tij) për të justifikuar mashtrimin që kanë bërë me FBI në Tiranë.
Që të jem më konkret, FBI nuk ka prezencë në Tiranë siç u trumpetua para një muaji, kur u anoncua operacioni dështak “Forca e Ligjit”! Janë vetëm dy punonjës të Departamentit të Drejtësisë (oficerë të FBI), që vijnë këtu njëherë në tre muaj për qëllim marrje informacioni për Amerikanët që hyjnë e dalin në Shqipëri. Kaq bëjnë!
Marrëveshja që ata janë këtu ka të bëjë me shkembim informacioni për kufinjtë që i duhen SHBA, jo ne.
Në mënyrë qesharake Ministri i Brendshëm i ka venë edhe një zyrë në dispozicion pa ja kërkuar askush. Këtë e bëjnë vetëm që të dalë nami që FBI po “bën hatanë”.
Në fakt policia politike dhe grupe prokurorësh luajalë të pushtetit aktual kanë filluar të punojnë sipas një axhende politike tashmë. Në këtë moment po vendosen “kufinjtë ndërmjet njëri-tjetrit. Pra po vendoset se ku fillon e ku mbaron pushteti i Kryeministrisë në Ministrinë e Brendshme. Debati i tensinuar për praninë e Haki Cakos ende në krye të policisë e dëshmon këtë gjë…
Emri FBI përdoret thjesht si dordolec që tremb njerëzit. Mjeshtër i propagandës mbetet shefi i pushtetit!
Tani Rama shpreson që Trump të mbajë fjalën dhe të ndërpresë ndihmën për Shqipërinë, që do të thotë në fakt largim ose të paktën zbythje të atyre amerikanëve që janë kryesisht të OPDAT dhe që i kanë dhënë gojës vend e pa vend.
Kjo vlen gjithashtu edhe për Ambasadorin, i cili po sfumon shefin e pushtetit këtu me daljet e tij publike.
Kështu gjendet dhe alibia se për mos ardhjen e FBI, sic është propaganduar se ajo do na luftojë korrupsionin tonë!
Ja kaq është kjo punë! Të tjerat janë tjerrje koti! Nuk ka mbetë politika e jashtme Amerikane e botërore me sytë nga Shqipëria!
Ndaj them që Presidenti është nxituar me atë letër. Duhet ta kishte analizuar më parë sjelljen e pushtetit, se është i lexueshëm!
Shtet nuk ka më!
Pushtet ka pafund!
