Ambasadori amerikan në vendin tonë Donald Lu ishte sot në ambjentet e Prokurorisë së Përgjithshme, ku zhvilloi një takimi me prokuroren e re të përkohshme Arta Markun.
Takimi 30 minutësh mes Prokurores së Përgjithshme të përkohshme Arta Marku dhe Ambasadorit Amerikan Donald Lu, sipas “News 24”, kishte për qëllim nxitjen e kryeprokurores që të shenjestrnte krimin dhe korrupsionin në nivele të larta. “Të shënjestrohen të lidhurit me krimin dhe me Saimir Tahirin”- mësohet të ketë thënë Lu, sipas “News 24”.
Ai i ka përcjellë asaj mesazhe të qarta për luftën ndaj krimit dhe korrupsionit si dhe “te inkurajojë prokuroret në hetime për këtë çështje. SHBA dëshiron që kryeprokurorja të punojë e pavarur”.
Ambasadori Lu ka përshëndetur zgjedhjen e Markut si kryeprokurore, dhe u shpreh se tani do të fillojë një kohë e re ku do të ketë hetimi për të gjithë. Ky takim vjen në një klimë jo të mirë politike pasi opozita nuk e votoi Markun, për tu vendosur në krye të akuzës.
Po ashtu nga opozita ka patur kontestime dhe për mbështetjen që Lu i ka bërë zgjedhjes së prokurores së re. Më herët gjatë ditës së djeshme Donald Lu takoi, Monika Kryemadhin dhe Lulzim Bashën.
