Gjykata e Tiranës ka rrëzuar kërkesën e Prokurorisë për mbylljen e dosjes së privatizimit të OSSH nga CEZ, duke e kthyer atë për hetim.
Menjëherë pas këtij vendimi, ka reaguar kreu i grupit parlamentar të Partisë Socialiste, Taulant Balla, i cili ka përsëritur emrat që duhet të thirren në prokurori teksa doli në një konferencë për mediat.
Deputeti socialist akuzoi Prokurorinë se ka dashur të mbyllë hetimet pa thirrur dëshmitarët duke e konsideruar punën e saj skandaloze, ndërsa ka kërkuar që të thirren në Prokurori Shkëlzen Berisha, Nue Kalaj dhe Hamza Merxhani.
Ky i fundit është shqiptaro-maqedonasi me banim në Çeki, i përmendur si ndërmjetës në privatizimin e OSSH nga CEZ, i cili dëshmoi ne komisionin hetimor ngritur nga maxhoranca për këtë çështje, përmes një video konference.
“Prokurorja e çështjes kishte hetuar dosjen me mbi 5 mijë faqe për 10 ditë. Vendimi i gjykatës është lajm i mirë, por puna e prokurorisë është një skandal. Duhet të hetohet Nue Nika. Prokuroria kërkonte mbylljen e çështjes pa thirrur të dëshmitarët në gjykatë. Në dosjen e kallëzimit është miratuar edhe denoncimi lidhur me shoqëritë e mbledhjes së borxheve. Me vendim të gjykatës së Shkallës së Parë Ismailaj është dënuar me shumë vite burg për korrupsion. U kërkua mbyllja e hetimit pa dëshmitë përkatëse. Rreth 414 milionë leke dëm shtetit nga favorizimi i CEZ”, tha Balla ndër të tjera.
