Kreu i Partisë Demokratike ka kujtuar ditën historike të 7 viteve më parë, kur Shqipëria nën drejtimin e PD-së fitoi të drejtën për të lëvizur lirisht në Evropë.
Basha e kujton ditën e heqjes së vizave, si ditën kur u mor hapi më i madh, ndërsa bën një krahasim me situatën aktuale, për të cilën fajëson kryeministrin Edi Rama.
Deputeti demokrat shkruan se Shqipëria ka bërë hapa mbrapa dhe se rrezikon izolimin, ndërsa se sot është një ditë e mirë për të bërë “një dallim mes politikës që shërben, dhe një qeverie të lidhur me krimin”.
Postimi i Lulzim Bashës:
7 vjet më parë, nën drejtimin e Partisë Demokratike, shqiptarët fituan të drejtën për të lëvizur lirisht në Europë. Heqja e vizave ishte akti me domethënës dhe ndoshta hapi më i madh i marrë deri tani i hapjes së vendit tonë, i përfitimit nga integrimi, i realizimit të aspiratës për të qënë pjesë e Europës. Heqja e vizave ishte fryt i një pune të jashtëzakonshme në vendosjen e ligjit, luftën kundër krimit, sigurimin e kufijve, pasaportat biometrike dhe i plotësimit të mbi 120 kritereve të forta teknike dhe politike.
7 vjet më pas, nën drejtimin e Edi Ramës, Shqipëria ka bërë hapa mbrapa. Vendet anëtare e kanë vendosur Shqipërinë nën monitorim dhe vendi rrezikon izolimin për shkak të fuqizimit të krimit të organizuar me bazë në Shqipëri, për shkak të eksodit masiv nga keqqeverisja e Edi Ramës.
Me Edi Ramën Shqipëria u bë sera më e madhe e drogës në Europë, sepse Shqipëria nuk ofron më siguri, por mbrojtje dhe pasurim për krimin e organizuar që trafikon lëndë narkotike e armë, dhe pushtetarët e lidhur me të. Këtë realitet e konfirmoi Europol vetëm një javë më parë.
Sot pra, është një ditë e mirë për të bërë një reflektim dhe një dallim mes politikës që shërben, dhe një qeverie të lidhur me krimin, që mendon për veten e saj dhe një grusht oligarkësh e trafikantësh.
