Ai u shkarkua nga klubi i Manchester Uited në 2016-ën, por duket se akoma nuk e ka kapërdirë këtë fakt dhe është rikthyer sërish të flasë për ekipin pas humbjes në derbi. Louis van Gaal është i mendimit se futbolli që luante ekipi në kohën e tij është më tërheqës se ai që shohim sot me Mourinhon. Holandezi pretendon se Manchester United dominohet nga kundërshtarët dhe nuk luan lojë ofensive, por rri gjatë gjithë kohës e mbyllur në mbrojtje.
“Ne luanim futboll shumë të mirë në atë kohë, por në Angli nuk është loja ajo që vlerësohet. Duke iu referuar asaj që shoh dal në konkluzionin se Mourinho nuk kritikohet aspak, sikurse them me bindje se futbolli që ata bëjnë sot është shumë monoton. United sot prodhon vetëm lojë në mbrojte. Strategjia ime ishte e kundërta, gjithnjë ka qenë sulmi. Provë për këtë është fakti se të gjithë kundërshtarët në atë kohë kalonin në mbrojtje. Sot kjo nuk ndodh.”
Gjithsesi, si për të balancuar paksa deklaratën me nota kritike ndaj pasuesit të tij, Van Gal shprehet se ecuria aktuale e Manchester United në Premier League nuk ëshë vetëm për meritë të strategjisë së Mourinhos.
“Mendoj se në vetvete Mourinho është një personazh simpatik. Problemi i vërtetë qëndron tek shefi ekzekutiv i United, Ed Woodward. Ai nuk di të komunikojë, këtë e ka bërë dhe me mua. E të mendosh që unë jam një njeri shumë i hapur për dialog produktiv. Nga eksperienca mund të them se i njoh mirë rregullat e pashkruara të futbollit, ndaj mendoj se një klub duhet jetë i përgatitur edhe për të panjohurat. Gjithsesi, mënyra sesi më shkarkuan ishte shumë e padrejtë.”
