Drejtori i Përgjithshëm i Partizanit, Olsi Rama ishte i ftuar një natë më parë në emisionin “Procese Sportiv”, ku foli për herë të parë në emër të klubit “të kuq”. Ai është shprehur se primare për Partizanin dhe për Olsin është rikthimi i kampionatit të dy viteve më parë që iu hoq Skënderbeut, pas dënimit nga UEFA dhe dorëzimin e tij tek Partizani.
“Gjëja e parë që kërkova kur erdha te Partizani, ishte që të dërgonim një kërkesë në FSHF për titullin e dy sezoneve më parë. Kërkesa është bërë tashmë në FSHF dhe ajo po pret vendimin e Apelit në UEFA në lidhje me dënimin e Skënderbeut. Ai titull i takon Partizanit”, deklaroi Drejtori i Përgjithshëm i Partizanit, Olsi Rama.
Ndërsa gjatë emisionit nuk kanë munguar dhe kërkesat për atë që të marrë në drejtim edhe ekipin e Dinamos, pasi ka disa vite që vazhdon të qëndrojnë në një hije të zezë dhe nuk po ringrihet dot.
“Dua që Olsi të bëhej drejtor i Dinamos, që të ringjallej edhe ajo. Siç bëri me Partizanin, që po e ringre. Kur flet për Olsin nuk lodhesh, por shplodhesh.” – u shpreh analisti Gëzim Sinemati.
Sa i përket trazirave që ndodhën në fillim të ndeshjes me Teutën, ku tifozët nuk u lejuan të futen në stadium nëse nuk do të kishin me vete një mjet identifikimi. Rama tha se në Shqipëri nuk është akoma kultura e të mbajturit një mjet identifikimi me vete.
“Kam përshtypjen se erdhi si pasojë e ngjarjes që ndodhi në “Asllan Rusi” (Tirana-Partizani, basketboll). Nuk ishin njoftuar më parë tifozët që duhet të kishin kartë identiteti me vete. Në Shqipëri nuk është kulturë që të mbajmë me vete mjetin e identifikimit”.
Në lidhje me dhunën në futboll, marrë shkas nga ngjarja në takimin Përmeti-Këlcyra, ku u godit gjyqtari Alvi Paco nga lojtarët e Këlcyrës, Olsi Rama ka renditur disa nga faktorët që bëhen shkas për dhunën në futbollin shqiptar.
“Së pari mendoj se është niveli jo duhur i futbollit. Faktor tjetër është edhe struktura ku vetëm futboll nuk luhet. Vetë infrastruktura nuk të imponon respekt për lojën.
Dënoj ofendimet në stadium. Do doja që stadiumi të ishte një arenë feste. Në stadium dëshiroj të ketë tifozë, ashtu siç duhet të ketë baballarë, fëmijë, vajza. Futbollistët dhe gjyqtarët bëjnë gabime, normale, por gjithë ai zemërim i tifozëve është i ekzagjeruar”, deklaroi Drejtori i Përgjithshëm i Partizanit, Olsi Rama.
