Derbi i Manchesterit u fitua nga lojtarët e Guardiolas me rezultatin 2-1 në “Old Trafford”, ku siguroi edhe shkëputjen me 11 pikë nga rivalët e tyre më të afërt për titull. Por kjo sfidë nuk ka përfunduar pa incidente, pasi në dhomat e zhveshjes pas përfundimit të takimit ka pasur konfrontime fizike mes lojtarëve.
Në dhomën e zhveshjes së City po festonin pas përfundimit të takimit dhe bossi i United, Mourinho është futur aty dhe në portugalisht u ka kërkuar që të kenë respekt për kundërshtarin. Portieri brazilian Ederson ka qenë i pari që është përballu me të, e më pas janë bashkuar edhe lojtarët e tjerë. Mësohet se ata kanë hedhur në drejtim të Mourinhos ujë dhe qumësht. Ndërsa në moment kanë ndërhyrë edhe lojtarët e “djajve”, të cilët kanë filluar një konfrontim fizik me “qytetarët”.
Lukaku ka qenë protagonisti më i egër në këtë konfrontim që nuk ka zgjatur më shumë se dy minuta, por pasojat nuk kanë qenë aq të vogla. Anëtari i stafit drejtues të Manchester City, Mikel Arteta ka pësuar dëme më serioze, pasi ka përfunduar me një vetull të carë. Nuk ka filmime për këtë situatë pasi në dhomat e zhveshjes së “Old Trafford”, nuk janë lejuar të futet ekuipazhi i kamerës së Amazon Amazon, të cilët janë duke xhiruar një dokumentarë për “qytetarët’.
Një situatë e tillë ka ndodhur edhe në “Stamford Bridge” në shtator, ku ka pasur përleshje mes lojtarëve dhe trajnerëve të ekipeve respektive. Edhe atje gjakrat janë nxehur pas festimit të fitores nga lojtarët e City, por mendohet se iniciatorët kaë qenë trajnerët e të dy ekipeve të cilët janë përfshirë në këtë debat të ashpër. ndërsa të dielën Guardiola mendohet të mos jetë përfshirë në incidentin e shkaktuar në dhomat e zhveshjes. TIRANA TODAY
