Shqipëria po vijon të mbetet në çizmen e peshqve të mëdhenj të drogës. Ky është konstatimi që bën media angleze “High Times” e cila i referohet kultivimit masiv të kabanisit në vendin tonë. Sipas analistit, Bill Weinberg pavarësisht propagandës së qeverisë se po lufton kultivimin e drogës, fenomeni vazhdon të mbetet serioz. Ndërsa po pengon seriozisht integrimin në Bashkimin Evropian.
“Qeveria është përpjekur të luftojë kanabisin vitet e fundit, dhe në disa raste ka hasur në një rezistencë të armatosur nga kultivuesit e drogës. Me gjithë propagandën e madhe se Shqipëria ka mundur të pastrojë vendin nga kabanisi, kjo çështje mbetet ende e mprehtë për vendin. Ndërsa Shqipëria kërkon të bëhet pjesë e Bashkimit Evropian, ambasadori amerikan Donald Lu iu drejtua liderëve shqiptarë përmes një deklaratë të frikshme se rrjetet kriminale në vend mbeten ende të paprekura”, shkruan Bill Weinberg.
Peshqit e mëdhenj
“Përderisa peshku i madh nuk është arrestuar dhe të shkojë në burg, kanabisi do të jetë po aty, gjyqtarët do të marrin ryshfet dhe zyrtarët do të jenë po aq të korruptuar”, tha Lu përgjatë një mbledhje juristësh në Tiranë.
Lu e përshkroi Shqipërinë si “një qendër e aktivitetit të krimit të organizuar, që përfshin trafikimin e drogës, armëve dhe prostitucionit”. Ndërsa u shpreh se katër klane të mëdha shqiptare kontrollojnë 20 familje të përfshira në një gamë të gjerë të ndërmarrjeve kriminale.
“Shqipëria ka një treg të zi të konsiderueshëm. Vendi mbetet në rrezik të madh për pastrimin e parave për shkak të korrupsionit të shfrenuar dhe një sistemi të dobët ligjor”, tha Lu.
Edi Rama
Edi Rama, i cili fitoi një mandat të dytë në zgjedhjet e qershorit thotë se pret që Shqipëria të bashkohet me BE-në në fillim të viteve 2020.
Por përpara se të fillojnë bisedimet, Shqipëria duhet të tregojë përparim në frenimin e krimit të organizuar dhe korrupsionit në sistemin e drejtësisë. Financial Times raportoi në korrik se vetëm gjatë vitit të kaluar, kultivimi i kanabisit ra me 75 për qind. Por raporti, thekson gjithashtu se kanabisi vijon të kultivohet. Dhe të rinjtë e papunë joshen ende nga ekonomia e kanabisit pavarësisht nga presioni në rritje i policisë.
Droga dhe procesi i integrimit në BE
Kjo nuk e ndihmon aspak Shqipërinë në aspiratat e saj për t’u integruar në BE, kur më 14 tetor policia në Mbretërinë e Bashkuar kreu 10 arrestime në goditjen e radhës ndaj bandave të dyshuara si shqiptare. Operacionet e policisë britanike rritën intensitetin e tyre në të gjithë zonën e Gloucestershire të Mbretërisë së Bashkuar. Ndërsa hetimet vazhdojnë mbi dyshimet për trafikimin e mundshëm të qenieve njerëzore, pasi kushtet e punëtorëve që janë në të zezë janë të kushte mizerabël.
“Ne do të vijojmë të shqyrtojmë të gjitha mundësitë nëse ata janë viktima të skllavërisë së sotme, pa marrë parasysh pjesën e kriminalitetit”, tha një burim i policisë.
Lazarati dhe droga sot
Iniciativa e legalizimit të kanabisit në Shqipëri për ta shkëputur nga ekonominë e kanabisit nga duart e rrjeteve kriminale drejt fermerëve të vegjël dështoi tërësisht për shkak të kundërshtimeve nga Shtetet e Bashkuara dhe Bashkimi Evropian. Ndërsa qeverisë iu desh për të ndërhyrë në zonën e Lazaratit dhe pastruar atë nga mbjellja e kanabisit. Por, vitet më pas droga do të mbillej në të gjithë vendin siç edhe ka rezultuar nga vetë operacionet e policisë. Dhe nga skandalet e shumta, ku qeveritarët kanë rezultuar të lidhur me trafikun e drogës, siç ishte edhe rasti i ish-ministrit të Brendshëm Saimir Tahiri. TIRANA TODAY
