Kreu i partisë “Zgjidhja”, dikur deputet i PS-së, ka zbuluar komplotin që sipas tij, iu bë për t’ia hequr mandatin.
Koço Kokëdhima ka hedhur akuza të rënda ndaj kryeministrit Rama, teksa tha se njerëzit e Edi Ramës i bënë komplot, si për t’i thënë se Rama ishte i distancuar nga historia e heqjes së mandatit, teksa ka folur për disa përgjime,për të cilat kishte dijeni Saimir Tahiri.
“Një lojë dhe një komplot i ndyrë, për të më treguar mua se Edi Rama ishte i distancuar nga historia e heqjes së mandatit tim dhe se nuk e kisha nga ai, por nga të tjerë”, tha Kokëdhima në emisionin e Artur Zhejit, në “360 gradë”.
Deklarata e Kokëdhimës
“Kisha dijeni, që Edi Rama ka komplotuar për të hequr mandatin tim. Dy ditë pas heqjes së mandatit, një funksionar i lartë i Ministrisë së Brendshme erdhi te unë me një dokument përgjimesh, ku sipas zbardhjes një drejtor i Ministrisë së Drejtësisë fliste me një eksponent të drogës. Ky i fundit i thoshte këtij drejtorit të rëndësishëm në Ministrinë e Drejtësisë, `se e pastruam rrugën (bëhej fjalë për largimin e Kokëdhimës si deputet në qarkun e Vlorës) dhe i kemi kaparosur ata të Gjykatën e Lartë`. Sipas ati përgjimit ky drejtor pohon, se ishte në dijeni edhe ministri.
Unë pyeta zyrtarin e lartë të ministrisë së Brendshme, se kush ka dijeni tjetër për këto përgjime, ai më tha menjëherë, se Edi Rama nuk di gjë. `Nuk të pyeta kush nuk ka dijeni, por kush ka”, i thashë. Pas kësaj më pranoi, se kishte dijeni Saimir Tahiri. Kur e pyeta nëse ky përgjim ishte zyrtar dhe i ligjshëm, më pranoi se çdo gjë ishte proceduriale dhe se çështjen e ka marrë në dorë prokuroria.
U interesova dhe investigova personalisht më vonë dhe rezultoi, se e gjitha ishte një falsifikim. Një lojë dhe një komplot i ndyrë, për të më treguar mua se Edi Rama ishte i distancuar nga historia e heqjes së mandatit tim dhe se nuk e kisha nga ai, por nga të tjerë”, ka thënë ai.
