18 milionë dollarë do të shpërndahen për shpërblimet e pensionistëve për festat e fundvitit.
Kështu bëri me dije ministri i Financave, Arben Ahmetaj, dje gjatë prezantimit të Aktit Normativ të buxhetit 2017 në Komisionin e Ekonomisë.
Brenda këtij muaji, qeveria do të mbyllë 100 për qind edhe dëmshpërblimet e këstit të 8-të për ishte përndjekurit që janë gjallë, ndërsa fondi për këtë kategori do të jetë 352 milionë lekë.
Ndryshimet e buxhetit 2017 u miratuan nga Komisioni i Ekonomisë. Opozita votoi kundër, pasi, sipas nënkryetares së komisionit, Jorida Tabaku, Akti Normativ nuk sjell asgjë të re për ekonominë, biznesin e punësimin, dhe ndryshimet janë për propagandë.
SHPËRBLIMET
Burime nga qeveria për gazetën Panorama, konfirmuan se pensionistët do të përfitojnë 3 mijë lekë shpërblim. Vendimi i posaçëm për shpërblimet do të miratohet në mbledhjen e ardhshme të qeverisë, ku pritet që përfitues të jenë edhe familjet me ndihmë ekonomike.
Brenda muajit dhjetor, qeveria do të mbyllë edhe dëmshpërblimin e këstit të 8-të për kategorinë parësore të ish-të përndjekurve. Ministri i Financave, Ahmetaj, shpjegoi se fondi prej 352 milionë lekësh shlyen 100 për qind këstin e 8-të të kategorisë parësore.
