Ambasada gjermane në Tiranë ka reaguar për çështjen e azilkërkuesve shqiptarë në Gjermani. “Asnjë asistencë e re financiare azilantëve të refuzuar. Azilkërkuesit e refuzuar asnjë mbështetje të mëtejshme. Për shqiptarët e refuzuar asnjë ndihmë financiare për kthim”. Ky reagim vjen pas lajmit te raportuar nga “DW” se do te jepeshin 1000 euro për azilantët që u ishte refuzuar azili dhe ndërmerrnin kthim vullnetar.
Sipas ambasadës gjemane, azilkërkuesit e refuzuar duhet të kthehen në Shqipëri. Po kështu ata mund të dënohen me ndalim hyrjeje në të gjithë hapësirën e vendeve Schengen për një periudhë, që mund të zgjasë deri në pesë vjet, nëse ata nuk pranojnë të largohen me dëshirën e tyre por kthehen forcërisht në Shqipëri.
Reagimi i plote
Ndryshe nga ç’raportojnë mediat shqiptare, azilkërkuesit me shtetësi shqiptare në Gjermani, të cilëve u është refuzuar kërkesa për azil, duke nisur nga data 1 dhjetor 2017 nuk mund të marrin në konsideratë asnjë mbështetje të mëtejshme financiare apo asistencën financiare për kthim.
Gjermania e ka kategorizuar Shqipërinë si vend të sigurt të origjinës: kërkesat për azil nga shtetasit/et shqiptarë/e – sikurse edhe nga vende të tjera të Ballkanit Perëndimor – përpunohen me procedura të përshpejtuara dhe refuzohen praktikisht në çdo rast.