Qeveria e Shqipërisë po zhvillon sot një mbledhje të përbashkët me qeverinë e Kosovës. Është mbledhja e katërt që këto dy qeveri realizojnë së bashku për të rritur bashkëpunimin ndërmjet dy vendeve shqiptare. Kryeministri Edi Rama në deklaratën për media tha se do të hapen pika të tjera kufitare ndërmjet Kosovës dhe Shqipërisë për të bërë më të lehtë shkëmbimin e mallrave dhe njerëzve. Rama tha se këto takime janë pozitive dhe produktive. Kryeministri deklaroi se është rritur ndjeshëm bashkëpunimi tregtar ndërmjet dy vendeve.
“Mbledhja e 4 e dy qeverive. Përgëzoj kryeministrin Haradinaj për reformat e ndërmarra. Dy qeveritë tona takohen sërish pas më shumë se një viti, ndaj duhet një bilanc për atë që është arritur po dhe atë që do të realizohen në të ardhmen. Mbledhja e dy qeverive është pozitive por dhe produktive. Deklarata e përbashkët e nënshkruan në Prizren është harta e parë e fillimit të bashkëpunimeve të dy qeverive. Ministritë e Kosovës dhe të Shqipërisë kanë grupe të përbashkëta pune dhe janë gjithë kohën në bashkëpunim. Është lehtësuar ndjeshëm procedura elektronike e transportit të mallrave. Është vendosur për hapjen e pikave të tjera kufitare. Do të vijojmë punë e hapjen e zyrës së Kosovës në portin e Durrësit. Hapja e zyrës do të lehtësojë dhe shkëmbimin e mallrave të Kosovës me vendet e tjera. Mallrat për Kosovën do ti kryejnë të gjitha procedurat doganore”, tha Rama në fjalën e tij.
