Është miratuar sot përcaktimi i kushteve dhe kërkesave teknike që duhet të plotësojnë subjektet që do të licencohen për kategorinë “lojërat elektronike në distancë”. Ky vendim është marrë sot në mbledhjen e qeverisë.
Kjo do të thotë se një kompani e huaj që zhvillon lojëra në internet duhet të regjistrohet në Shqipëri në mënyrë që faqet e saj të mos bllokohen. Ajo që duket e vështirë në rastin e “lojërave elektronike në distancë” është paraja që qarkullon në to.
E thënë ndryshe, një kompani e cila ka serverin në një shtet tjetër (pra jo në Shqipëri) mund të ofrojë lojërat e saj në internet. Pavarësisht se serverët nuk ndodhen në Shqipëri, lojtarët shqiptarë përmes internetit mund të luajnë në një nga këto lojëra.
Por si bëhet pagesa? Në këto raste bëhet me karta të parapaguara standard ose përmes kartave bankare. Ndërsa loja mund të luhet nga shtëpia, nga sallat e internetit apo edhe nga celulari në çdo vend ku ndodhet lojtari.
Në vendimin e saj të fundit, Këshilli i Ministrave sqaron kushtet që duhet të plotësojë një subjekt që operon në këtë kategori loje. Një prej tyre ka të bëjë me kapitalin i cili nuk duhet të jetë më i vogël se 1.2 miliardë lekë apo pak më shumë se 10 milionë dollarë.
Gjithashtu qeveria ka qartësuar se aplikuesit nuk duhet të kenë precedentë penalë që lidhen me vepra të ndryshme, ndërkohë që të paktën një prej aksionerëve të subjektit aplikues duhet të ketë eksperiencë në lojërat e fatit.
