Emmanuel Adebayor në një intervistë të dhënë për “Daily Mail” është shprehur se ka menduar disa herë të kryej një vetëvrasje pasi familja ushtronte shumë presion ndaj tij.
33-vjeçari nga Togo është shprehur se ka pasur disa raste ku ka menduar ti japë fund jetë pas kërkesave të shumta nga ana e familjes së tij për ti zhvatur paratë dhe që kurrë nuk u interesuan për shëndetin e tij. Kjo ka qenë arsyeja e depresionit që ka pësuar ish-lojtari i Manchester City, Arsenal, Tottenham etj. Ai shprehet se kishte bërë gjithçka për të shpëtuar familjen e tij nga varfëria, por ata asnjëherë nuk ndalonin duke ushtruar presion për të fituar edhe disa të holla më tepër.
“Kam menduar disa herë të vetëvritem, t’i jepja fund gjithçkaje. Kam mbajtur brenda meje këtë histori të trishtë për vite e vite me radhë dhe më vjen neveri për mënyrën sesi kanë shkuar gjërat. Por ndihem i rilindur për faktin se më në fund arrita të flas. Gjërat janë të vështira për t’u kapërdirë, sidomos kur punon shumë për të ndihmuar sadopak familjen që të shmangë varfërinë, por pavarësisht kësaj ata viheshin gjithnjë kundër meje”, rrëfen Adebayor.
“Gjithmonë u kam thënë vëllezërve të mi më të rinj se po manipuloheshim nga familja jonë. Shpesh kam ndryshuar numrin e telefonit, në mënyrë që familja ime të mos më kontaktonte. Më merrnin në telefon jo për të më pyetur sesi isha, por vetëm për të më kërkuar parà. Mbaj mend një herë kur isha dëmtuar teksa luaja për Tottenhamin. Më telefonuan në momentin kur po i nënshtrohesha një test të rëndësishëm mjekësor, për të më kërkuar nëse mundesha të paguaja këstet shkollore të një fëmije tjetër. Do të doja të paktën të më kishin pyetur njëherë sesi isha”, shprehet ndër të tjera sulmuesi togolez.
