Dhuna në Irak ka rënë në nivelin më të ulët që nga rrëzimi i Sadam Huseinit në vitin 2003, pasi Shteti Islamik humbi zonat e saj bazë. Gjithashtu sulmet e saj bombarduese janë penguar nga informatorët dhe agjentët e dyfishtë.
“Inteligjenca për sulmet e mundshme të ISIS është përmirësuar deri në atë pikë sa forcat qeveritare mund të mbikëqyrin një bombë nga ndërtimi e deri te shpërthimi”, rrëfen një zyrtar i lartë i sigurisë irakiane.
“Ne kemi njerëz që punojnë me ISIS, të cilët bien dakord të punojnë me ne. Sigurisht ISIS nuk e di këtë gjë dhe ne sigurohemi që agjenti jonë të mos ekspozohet. Ndonjëherë forcat e sigurimit paguajnë edhe makinën që transporton bombën në Bagdad dhe e lejon atë që të shpërthejë në vendin që ISIS e ka shënjestruar. Por fillimisht ne u kërkojmë njerëzve aty që të evakuohen dhe pas shpërthimit bëjmë një deklaratë zyrtare të rremë me një numër të caktuar të viktimave”, ka thënë ministri i Brendshëm Qasim al-Araji në një intervistë për “The Independent”, në Bagdad.
Zoti Araji, një udhëheqës i organizatë militante Shia Badr, mori detyrën e tij si ministër i Brendshëm një vit më parë, kur paraardhësi i tij dha dorëheqjen pas një bombe-makinë të ISIS që mori jetën e 300 personave në lagjen Karada në Bagdadin qendror.
Qasim al-Araji thotë se një gjë e tillë mund të ndodhë sërish, por tani është shumë më pak e mundshme pasi ISIS nuk mban më qytete dhe rrethe ku mund të organizojë dhe pajisë bombarduesit. “Kryesorja është se kalifati është thyer”, tha ai.
ISIS po tregon shenja të demoralizimit pasi po humbet buxhetet e fundit të terrorit, si dhe udhëheqësit ka të ngjarë se kanë pranuar humbjen në Mosul për shkak të superioritetit ushtarak të armiqve të tij. Gjithashtu liderët e ISIS mund të kenë përgatitur “qeliza të gjumit”, duke ruajtur armë, municione dhe depo ushqimore që t’ua mundësojnë forcave të mbetura për të mbijetuar e më pas të fillojnë sulmet e rastit. E gjithë kjo për të treguar se ata janë ende në vend dhe të fortë.
Por sipas ministrit të Brendshëm, kjo nuk mund të ketë sukses pasi ata kanë bashkëpunim me anëtarët e familjeve të ISIS, ku ndihmojnë njësitë e sigurisë së shtetit. “Një grua e një lideri të ISIS na kontakton ne gjatë ditës. Ne i japim asaj para dhe mbajmë sekret identitetin e saj. Ajo e bën një gjë të tillë pas ka dëshirë që të mbrojë fëmijët e saj”, tha ai. /Tirana Today/
