Ish-deputeti demokrat Astrit Patozi, tashmë i njohur i një nga kritikët më të ashpër të kreut të PD-së Lulzim Basha, e ka ironizuar këtë të fundit duke e krahasuar me trajnerin italian Ventura pas shkatërrimit që i solli kombëtares fqinje.
Me anë të një statusi në “Facebook”, Patozi shkruan se Basha është qesharak si Ventura, por ndryshe nga Italia, ku atje u mblodhën ca burra dhe e shkarkuan, “në Tiranë burrat u mblodhën që të shpallnin me unanimitet fitoren e humbësit”.
KUPTIMI I UNANIMITETIT NË SHQIP DHE ITALISHT
E gjithë Italia ishte e zhgënjyer dhe e pikëlluar nga disfata e kombëtares së futbollit me Suedinë, por traineri ngulte këmbë se e kishte drejtuar mirë skuadrën.
Kur të gjithë prisnin të paktën dorëheqjen e tij, si ngushëllimin më të vogël, Gian Piero Ventura numuronte sukseset, që kishin arritur “gli azzuri” në udhëheqjen e tij.
Dhe të gjitha këto i thonte në diten e qametit, kur e kishte nxjerrë Italinë jashtë botërorit, një gjë që kishte ndodhur vetëm një herë në histori, 60 vjet të shkuara.
U bë kaq qesharak, sa mund të krahasohej vetëm me Lulzim Bashën në Shqiperi, pas zgjedhjeve të 25 qershorit.
Ndryshimi i vetëm mes dy rasteve është se në Romë u mblodhën ca burra dhe e shkarkuan me unanimitet humbësin.
Ndërsa në Tiranë burrat u mblodhën që të shpallnin me unanimitet fitoren e humbësit.
