Gjykata e Kumanovës do të vendosë sot për rastin e vrasjes së Almir Aliut, vrasje kjo e ndodhur më 25 qershor të vitit 2016.
Sot jepet vendimin për Boban Iliqi, i cili akuzohet për “vrasje me paramendim dhe tentim për vrasje”.
Prokuroria akuzon për dhunë babain e Almirit, Sedat Aliun, dhe dy të afërm të tij, vepër e cila parasheh dënim me burg prej tre muaj deri në tre vjet.
Ngjarja fatale ndodhi në natën e 25 qershorit, kur prindërit e kishin dërguar të birin Almirin në spital për të marrë injeksion. Ata ishin duke pritur në radhë, për shkak se i lëshuan radhën një personi tjetër që ishte shumë i sëmurë, po ashtu shqiptar. Në atë moment ka ndërhyrë Boban Iliq, i cili ishte i shoqëruar me të dashurën tij.
Këtu filloi një zënkë verbale mes babait dhe të akuzuarit Iliq, e cila më pas në momentin që dolën nga spitali shkaktoi ngjarjen tragjike. Boban Iliqi me një veturë të tipit “Mercedes C200”, në të cilën ishte edhe vëllai i tij Bojan Iliqi, shtypi për vdekje vogëlushin. Por, duke mos përfunduar me kaq, vëllai Bojani doli nga vetura dhe me një shufër hekuri goditi Sedatin, babain e Almirit dhe dy familjarët e tjerë. Almiri për gati një javë luftoi për jetë, por më pas humbi jetën nga lëndimet e rënda.
Boban Iliqi ngarkohet me veprën penale “vrasje me paramendim dhe tentim për vrasje”, ndërsa tre familjarët e Almirit Sedat Aliu, Abdulla Aliu dhe Sami Demiri, akuzohen për vepër penale “dhunë”. Për të njëjtën akuzoheshj edhe vëllai i Bobanit, por Prokuroria e ka tërhequr padinë ndaj tij.
Nëna e Almirit, Mixhevere Kasumi, e kishte shumë të vështirë të fliste, pasi dhimbjen nga humbja e Almirit e ka ende të freskët, ndërsa uron që kjo fatkeqësi të mos i ndodhë as armikut.
“Unë kisha dasht që kjo fatkeqësi të mos i ndodhë as armikut më të madh, sepse të të humbë fëmiu prej një dore të keqe nuk është e lehtë. Unë shkova me shëru djalin, e djali më ndërroi jetë, unë nuk mundem ta përballoj këtë të keqe,” thotë Mixhevere Kasumi, nëna e Almirit në një intervistë për TV Shenja.
Duke folur për natën kur ndodhi fatkeqësia, ajo thotë se ende i rrinë në vesh fjalët e Almirit, i cili vazhdimisht po e kërkonte të atin.
“Nuk e harroj kurrë atë natë megjithëse Almiri gjithë atë plagë të rëndë që e ka pasur, thoshte babi ku është, mendonte që e ka mbytur edhe atë”.
Mixhevrja thotë se e gjithë kjo situatë ka bërë që ajo të mos mund të ju kushtojë shumë kujdes dy fëmijëve të tjerë, nga mërzia dhe e keqja që e ka kapluar që nga dita kur ka humbur të birin.
“Unë çdo moment jam me të, mendjen e kam tërë kohën tek ai, vetëm me trup jam këtu, se mendjen e kam gjithë kohës te ai. Kur i shoh shokët, gjeneratën e atij, unë nuk mundem ta përjetoj këtë të keqe, megjithëse i kam edhe dy tjerë, por unë nuk jam e aftë as për këto tjerët, me ju ndihmu të shkojnë në shkollë, me i kry detyrat, nuk jam e aftë pasi e mbaj mendjen vetëm tek ai”.
Ndërsa për atë që Prokuroria ka vendosur që t’ia tërheq akuzat vëllait të Bobanit Bojan Iliqit, Mixheverja tha se është krejtësisht kundër këtij vendimi, duke theksuar se edhe ai është po aq fajtor sa i vëllai.
