Shqipëri – Rusi, 37-122 (4-44, 17-21, 6-32, 10-25)
Ndeshja e vlefshme për eliminatoret e Europianit 2019 (Eurobasket Women 2019), mes kombëtares shqiptare të femrave dhe Rusisë është mbyllur me një rezultat skandaloz për vajzat kuqezi, 37-122. Kjo ishte një humbje që pritej duke ditur kapacitetin që kishte kundërshtari dhe forcën që kanë vajzat basketbolliste të trajnerit Viron Toska. Ishte një Shqipëri amatore që nuk pati asnjë shans të tregonte vlerat e saj, pasi në çdo moment u dominua nga ruset. Ndeshja ishte e vlefshme për Grupin C eliminator, ku janë edhe ekipet e Hungarisë e Lituanisë.
Gjatë 40 minutave, praktikisht u luajt vetëm në koshin kuqezi, me ruset që jo vetëm ishin superiore në çdo drejtim, por edhe dhuruan spektakël në fushë. Presingu i rivaleve dhe gabimet shpesh elementare të kombëtares tonë, vulosën fitoren e Rusisë që në periodën e parë, ku mikeshat u shkëputën 44-4. Ku avantazh prej 40 pikësh u thellua edhe në tri periodat e tjera edhe pse kombëtarja ruse luante shpesh me lojtaret e stolit, ndërkohë që zëvendësimet e shpeshta që bënte trajneri Toska nuk jepnin asnjë rezultat për Shqipërinë. Diferenca rritet me ritme të frikshme në favor të Rusisë, që në përfundim të lojës arrin një fitore të lehtë me rezultatin 122-37. Shqipëria del e turpëruar nga kjo sfidë e parë dhe do të nisë që nesër përgatitjet për duelin e dytë, që do të zhvillojë në Hungari ndaj kombëtares vendase më 15 nëntor.
