Një prej bareve të kryeqytetit është gjobitur me një shumë prej 3 milionë lekë gjobë të vjetra, ndërkohë në lokal nuk konsumohej asnjë cigare duhan. Sipas pronarit të lokalit në rrugën e Kavajës, inspektori ka plotësuar procesverbalin pa asnjë arsye faktike.
Sipas tij, inspektori i Institutit të Shëndetit Publik kërkoi numrin e nipit të biznesit dhe plotësoi procesverbalin ndërkohë që nuk kishte asnjë tavëll mbi tavolinë dhe tabela jashtë godinës tregonte shenjën ndaluese të përdorimit të cigares.
“Na është vendosur një gjobë mbi duhanpirjen. Ndërkohë që lokal nuk ka pasur asnjë shkelje të ligjit. Tavolinat kanë qenë pa tavëll. Njoftimi i duhanpirjes është i ngjitur në xham dhe nuk shoh asnjë shkelje ligji. Ndërkohë që inspektori vjen në lokal kërkon niptin e biznesit dhe ulet në tavolinë duke plotësuar procesverbalin. Pas katër ditësh ka ardhur një fletë gjobë prej 3 milionë lekësh të vjetra”, shprehet pronari i lokalit për emisionin “Stop”. Ndërsa ky fakt konstatohet edhe nga pamjet filmike të siguruara nga kamerat e sigurisë së lokalit. 
Ndërkaq zëvendëskryeinspektorja e Institutit të Shëndetit Publik thekson se kjo është e pamundur pasi nuk mundet që një inspektor të bëjë një veprim të tillë, ndërsa e cilëson videon si të manipuluar edhe pse ajo përkon me datën e vendosjes së gjobës.
“Atëherë mua më lë të dyshoj ose ai ka manipuluar në kamera dhe që ke specialistë sa të duash për të manipuluar dhe nuk është fakt për mua pasi edhe gjykata nuk e merr për fakt kur nuk është e autorizuar për të bërë një filmim të tillë. Ajo mund të jetë një filmim i një dite tjetër kur realisht mund të jetë krejt ndryshe”, thekson zëvendëskryeinspektorja e Institutit të Shëndetit Publik pasi ka parë videon e inspektorit që vendos gjobën prej 3 milionë eurosh.
