Kryeministri Rama ka dhënë detaje për mënyrën se si ai ka reaguar lidhur me akuzat se Tahiri është i përfshirë në trafikun e drogës, por edhe bisedat me ish-ministrin e Brendshëm.
Rama ka rrëfyer se çfarë i ka thënë Tahirit në momentin që mori vesh kur deputeti i kishte shitur makinën Habilajt:
“Kur e mora vesh mbaj mend që i thashë: Pse s’thua që makinën e paske bërë ushqim për qentë që nuk të ndahen”, u shpreh Rama, duke shtuar se:
“Antimafia italiane ka bërë një hetim dhe në këtë hetim nuk ka asnjë provë dhe aq më pak indicie për ndonjë implikim të ish-ministrit të brendshëm.”
I pyetur mbi komunikimin me Tahirin pas akuzës se ky i fundit ishte i përfshirë në trafikun e drogës, Rama rrëfeu bisedën:
“Kemi pas një komunikim normal dhe me mirëkuptim të plotë në sensin që as ai nuk kërkoi asgjë, por i qëndroi asaj që ka thënë në publik që në këtë betejë do ndjek rrugën time dhe unë s’mund t’i ofroja asgjë tjetër në rrugën që zgjodhi.
Tahirin e kam thirrur unë. Jam shokuar dhe neveritur nga ai pleh i madh, pastaj kam thënë që dua të vërtetën dhe të veprojë drejtësia.”
Rama komentoi shkurt dhe frazën e Tahirit “s’keni parë gjë akoma” e cila u pa si një presion i ish-ministrit të Brendshëm ndaj kryeministrit:
“Për këtë mund të pyesni vetë Tahirin, nuk komentoj deklarata që s’janë bërë nga unë. Megjithatë, fraza “s’keni parë gjë akoma” u keqpërdor. Ndërkohë, po jua rikujtoj, ka vetëm një njeri në këtë botë që mund të më shantazhojë mua, të tjerat nuk ekzistojnë”, përfundoi Rama.
