Ish-drejtori i Arkivës në Ministrinë e Brendshme, historian Kastriot Dervishi ka publikuar një fakt tronditës për sa i përket mënyrës së të jetuarit në kohën e komunizmit. Teksa ka publikuar një foto me tollonin e kategorisë F, Dervishi shkruan se në komunizëm një familje me 4 anëtarë përfitonte vetëm 2 kilogramë mish në vit.
Kështu, shton ai, nga nevoja për mish, qytetarët e Elbasanit kanë ngrënë qen dhe mace në vitin 1985.
“As në kushte lufte e urie shqiptari nuk ka ngrënë qen e mace”, përmbyll shkrimin e tij Dervishi.
POSTIMI I DERVISHIT:
Tolloni i kategorisë “F”
Siç edhe dihet, regjimi komunist i fukarallëkut, urisë dhe mizerjes, me triska e nisi dhe me triska e bitisi sundimin e tij. Asnjë blerës nuk mund të siguronte mallin pa paraqitur tollonin, të cilën e merrte në këshillin popullor të lagjes pasi ishte hetuar mirë e mirë e kaluara e tij.
Kjo është triska e kategorisë “F”, për ata që punonin në fshat, por jo për fshatarët e kooperativave, të cilët nuk e gëzonin të drejtën e tollonit. Siç edhe mund të shihet, sheqeri, sapuni, vajguri dhe madje edhe kripa ishin tejet të racionuara. Nga mungesa e sapunit, shqiptarët kishin edhe probleme higjiene.
Një familje fshatari merrte në atë kohë 2 kg mish në vit, një rekord historik ky që nuk ka pushtues që ia ka vendosur shqiptarit.
Kur regjimi hyri në fazën e fundit të lajthitjes së tij që e çoi në shkërmoqje ishin të racionuara dhe me tollon: mishi, sallami, djathi, veza, orizi, fasulja, kafeja, veza, etj. Për qumështin e kosin nuk paraqitej tollon, pasi tregu nuk furnizohej rregullisht.
Tolloni jepej për një muaj. Zakonisht në rastin më të mirë, një familje me 4 persona merrte 2 kg mish, 30 kokrra vezë dhe 2 kg djathë.
“Njeriu i ri” i socializmit u shpërfytyrua aq shumë saqë në vitin 1985 nga nevoja për mish, p.sh. në Elbasan janë ngrënë edhe qen e mace. As në kushte lufte e urie shqiptari nuk ka ngrënë qen e mace.
