Kreu i Inspektoriatit të Përgjithshëm, Shkëlqim Hajdari tha se reformimi i inspektoriateve është mjaft i rëndësishëm, pasi do të shmangë çdo abuzim të mundshëm. Teksa mori pjesë në aktivitetin “Tirana Business Matching”, Hajdari theksoi se reforma do të marrë kohë, por nga ana tjetër do të rrisë nivelin dhe do të ulë shpenzimet. Po ashtu, kreu i Inspektoriatit të Përgjithshëm tha se vitin tjetër do të ketë një ndërtesë multi-funksionale, ku do të funksionojnë të gjitha inspektoratet në mënyrë të pavarur nga njëra-tjetra.
“Digjitalizimi i Inspektoriateve Shtetërore ka mbaruar, kemi mbaruar trajnimin e 1400 inspektorëve. Kemi pajisur me kartë digjitale çdo inspektor të Inspektoriatit Shtetëror dhe me pajisje për ta bërë inspektimin online. Aktualisht ka Inspektoriate Shtetërore që bëjnë inspektimin siç e parashikon ligji, me synimin nga ana jonë që në marrëdhënie me biznesin të jenë trupa këshilluese, ta ndihmojnë për formalizim biznesin dhe jo ta penalizojnë. Ne po bashkëpunojmë me profesorë, njerëz kompetentë në fushën e inspektimit, kemi muaj që punojmë me shumë dhoma të biznesit të huaj dhe vendas. Sapo jemi kthyer nga Franca, kemi kryer vizita reciproke të inspektorëve me qëllim që të balancojmë atë që nuk e kemi. Jemi i vetmi vend në Ballkanin Perëndimor që kemi iniciuar administrimet.
E vetmja gjë që vuan inspektorati, është që trupave të inspektimit u ka pëlqyer korrupsioni. Urdhri është i qartë që inspektimet të bëhen vetëm me dokumente standarde, me check-lista dhe online. Reforma do të marrë kohë, ne synojmë që inspektoratet t’i bashkojmë sipas objektit të përbashkët për të shmangur inspektime të njëjta. Ne do bashkojmë disa inspektorate që të rrisim nivelet dhe të ulim shpenzimet e mbajtjes së trupave të inspektimit për të finalizuar vitin e ardhshëm me një ndërtesë mulifunksionale ku të gjitha inspektoratet të jenë të pavarur por të jenë në një ndërtesë të përbashkët me to. Inspektimet digjitale me dokumente standarde e edukojnë trupin e inspektimet dhe biznesin që marrëdhëniet të jetë një marrëdhënie ligjore”, përfundoi Hajdari.
