Ka qenë Diego Armando Maradona njeriu që i dorëzoi çmimin “The Best”, Cristiano Ronaldos, por me atë që ka deklaruar nuk e ka bërë me shumë dëshirë. Ai ka deklaruar se nuk mund ta besonte që kur në garë ishte Leo Messi, ai nuk ia jep çmimin atij, por Cristianos. Maradona ka një dashuri të veçantë për yllin argjentinas dhe ka qenë trajneri i tij në kombëtaren e Argjentinës për disa kohë. Pavarësisht të gjithave edhe ish-ylli i Napolit ka mbajtur një qëndrim kritik ndaj Leo Messit, se tek Argjentina ai nuk bëhet lider, siç ndodh kur vesh bluzën e Barcelonës. E ta udhëheqë atë në fitimin e trofeve.
“Më dhembi në shpirt kur i dhashë çmimin e më të mirit Ronaldos, dhe nuk kisha mundësia t’ia jepja Mesit”, tha Maradona.
Argjentina, nën epokën e Messit ka humbur 3 finale radhazi në kompeticionet më të rëndësishme në po kaq vite: finalen e Botërorit 2014 me Gjermaninë, finalen e Kupës së Amerikës 2015 me Kilin, si dhe finalen e Kupës së Amerikës me rastin e 100-vjetorit (në vitin 2016), gjithashtu ndaj Kilit.
Maradona, i cili udhëhoqi Argjentinën si kapiten në fitimin e Botërorit të vitit 1986, ishte zhgënjyer që Messi nuk e kishte ftuar në dasmën e tij gjatë verës, duke shtuar spekulimet se mes tyre gjërat nuk shkonin mirë. Megjithatë, ish-heroi i Napolit gjithashtu, u pa tejet i afërt me Messin gjatë ceremonisë së të hënës mbrëma.
“Takimi me Messin ishte i shkëlqyer, – tha Maradona. – Fola me të, e besoj se të gjithë e patë që ishte e njëjta miqësi dhe afeksion si kurdoherë më parë”.
