Shqiptarët e Kosovës po e vizitojnë më pak vendin tonë. Kështu rezulton në një raport të publikuar nga INSTAT, ku sipas të dhënave, në 9 mujorin e 2017-ës ka pasur rënie të hyrje të shtetasve të Kosovës në Shqipëri, që është ulur me 22,1%.
Nga ana tjetër, ndër vendet që kanë hyrjet më të larta të shtetasve në Shqipëri, rritja më e madhe e hyrjeve ka ardhur nga Polonia me 65,6 %.
Numri i shtetasve të huaj të hyrë në vendin tonë në nëntëmujorin e 2017 është 4.224.683, duke u rritur me 5,7 %, në krahasim me të njëjtën periudhë të vitit 2016.
Për sa i përket muajit shtator, numri i shtetasve shqiptarë dhe të huaj të hyrë në territorin shqiptar, është 852.743. Krahasuar me Shtator 2016, ky tregues rezulton me rritje 8,8 %.
Numri i shtetasve të huaj të hyrë në vend është 459.168, krahasuar me shtator 2016, ky numër është rritur me 12,9 %. Në Shtator 2017, ndër dhjetë vendet që kanë hyrjet më të larta të shtetasve në Shqipëri, ato nga Zvicra kanë pësuar rritjen më të madhe me 115,8 %, ndërsa uljen më të madhe e kanë patur shtetasit nga SHBA me 21,8 %.
Shtetasit shqiptarë dhe të huaj të dalë nga vendi, gjatë muajit Shtator 2017, janë 1.053.181, duke shënuar një rritje me 11,2 %, krahasuar me të njëjtën periudhë të një viti më parë. Numri i shtetasve shqiptarë të dalë nga territori i Shqipërisë, gjatë muajit Shtator 2017, është 498.678.
Krahasuar me Shtator 2016, ky numër është rritur 6,3 %. Numri i shtetasve shqiptarë të dalë nga territori i vendit tonë në nëntëmujorin e 2017 është 3.937.855, duke u rritur 5,6 %, krahasuar me të njëjtën periudhë të një viti më parë.
Hyrjet e shtetasve të huaj dhe shqiptarë në muajin Shtator 2017, në rrugë tokësore zënë peshën më të madhe të hyrjeve gjithsej me 79,1 %, ndërsa hyrjet në rrugë ajrore zënë 13,3% dhe detare zënë 7,6 %.
